Өрт сөндіру пойызының дайындығы пысықталды
Ақтөбе облысы бойынша меншікті тілші
«ҚТЖ» ҰК» АҚ Ақтөбе магистралдық желі бөлімшесіне қарасты өрт сөндіру пойызының 2025-2026 жылдарға арналған қысқы дайындығы тексерілді.
Өрт сөндіру пойызының бас инженері Темірбек Елғонды бүкіл процесті бастан-аяқ өз бақылауына алды. Өрт сөндіру пойызының агрегаттары мен мотопомпалардың жұмысы жіті тексеріліп, техникалық жағдайы бағаланды. Пойыздың жылу жүйесі, төтенше жағдайға дайындығы және өрт қауіпсіздігі талаптарына сәйкестігі оң бағаланды. Өрт сөндіру пойызы 54,860 тонна отынмен қамтамасыз етілген, жеке құрам арнайы киіммен 100 пайыз жабдықталған.
Мамандардың айтуынша, қыстың алдында жүргізілетін тексеріс – қауіпсіздіктің басты кепілі. Қыста ауа райының күрт өзгеруі мен қатты аяздың алдын алу үшін барлық салада дайындық шаралары жалғасуда.
Ақтөбе өрт сөндіру пойызының қарауыл бастығы Жаңбырбай Әбдіғазиев тұрғындар қыс мезгілінде қауіпсіздік ережелерін сақтап, ауа райын бақылап отыруды, қарлы боран кезінде алыс жолға шықпауды қаперге алуды ескертті.