Баршаға ортақ жауапкершілік
Қызылорда облысы бойынша меншікті тілші
«ҚТЖ» ҰК» АҚ бойынша жарияланған «Теміржол инфрақұрылымы объектілерінде тасымалдау процесінің қауіпсіздігін және тасымалданатын жүктердің сақталуын күшейту» айлығын өткізуге «ӘТЖК» ЖШС Түркістан филиалының Қызылорда атқыштар командасы да атсалысуда.
Қазан айының 14-нен қарашаның 14- іне дейін жалғасатын айлықтың мақсаты – теміржол бойындағы тәртіпті күшейту, бөгде адамдардың станция парктеріне заңсыз өтуін болдырмау, теміржолшылардың қызметтік құжаттарының жарамдылығын тексеру, әр қызметкердің өз орнында қауіпсіз еңбек етуін қамтамасыз ету.
Команданың бастығы Рахман Жұмабеков атқыштар Қызылорда желілік полиция бөлімімен бірлесіп рейдтік шаралар өткізіп, станция аумағын заңсыз кесіп өтушілермен түсіндіру жұмыстарын жүргізіп жатқанын айтты. Нәтижесінде 18 азаматқа ескерту хаттамасы толтырылып, қайта қайталамау қажеттігі түсіндірілген.
Қауіпсіздік тек темір жолда ғана емес, оның маңайында да сақталуы қажет. Сол себепті атқыштар ауыл тұрғындарымен кездесіп, малды қараусыз жаюдың қауіптілігін айтып, теміржол бойында тәртіпті сақтауға шақырды. Төрт түлік жолға шығып, қозғалысқа қауіп төндірген екі жағдай тіркеліп, мал иелеріне ҚР ӘҚБК 559-бабы бойынша айыппұл салынды.
Жас ұрпақтың да қауіпсіздік мәдениетін қалыптастыру мақсатында теміржол маңындағы мектептерде «Темір жол – қауіпті аймақ» атты кездесулер өтті.
Оқушыларға пойыздың қозғалыс жылдамдығын, рельс үстінде ойнаудың қатерін нақты мысалдармен түсіндіріп, жаяу жүргіншілер көпірін ғана пайдалану қажеттігін айтты. Мұндай кездесу үш мектепте ұйымдастырылып, балаларға қауіпсіздік ұғымы түсіндірілді.
Айлық аяқталған соң да бұл бағыттағы жұмыстар тоқтамайды. Себебі қауіпсіздік – үздіксіз бақылау мен сергектікке сүйенеді.