Әдістемелік сабақ өтті

 Атырау магистральды желі бөлімшесі ғимаратының акт залында «Азаматтық қорғаныс имиджін көтеру» тақырыбында семинар-сабақ өтті. Шараны бөлімшенің азаматтық қорғаныс және төтенше жағдайлар бөлімі ұйымдастырып, оған ПЧ, ШЧ, ЭЧ, НЖС-13 аппарат басқармасы, өрт сөндіру, қалпына келтіру пойыздары, вокзал шаруашылығынан азаматтық қорғанысқа жауапты мамандар, барлығы қырыққа жуық адам қатысты. Шараны бөлімше бас инженері Амангелді Рахмеденов ашып, өндірісте азаматтық қорғаныс шараларын дұрыс жүргізе білудің маңызына тоқталды. 

Сабақтың теориялық бөлімінде облыстық ТЖД Азаматтық қорғаныс басқармасының офицері Данабек Әзірбаев «Азаматтық қорғаныс дегеніміз не?» деген тақырыпта дәріс оқып, мамандар табиғи және техногендік сипаттағы төтенше жағлайлар, жер сілкінісі, өрт қауіпсіздігі, газдан улану, өрт сөндіргішті пайдалану, т.б. туралы айтты. «Мәселен, қарапайым телефон қуаттағыштан да өрт шығып жатады. Үй жылыту қазандарының мұржаларын тазалау да маңызды, өйткені газ жарылысы осы жерден болады. Шылымды сөндірмеу үлкен өртке ұласуы мүмкін, көліктегі газ баллонға жанар май құю тәртібін білу де маңызды. Қазір Жайық өзенінде мұз жұқа, сондықтан одан өтем деп суға кету қаупі жоғары. Мұздың қалыңдығы 25-30 см болған жағдайда ғана өту, онда да өте сақ болу қажет» деп атап өтті мамандар.

Практикалық бөлімінде ТЖД Жедел құтқару жасағының және Апаттар медицина орталығының дәрігерлері алғашқы медициналық көмек көрсету, травматизмнің алдын алу қағидасын, сондай-ақ түтінге не газға уланғанда, өрт шыққанда, суға кеткенде, суға тұншыққанда, т.б. төтенше жағдайларда қандай іс-әрекет жасау керектігін көрсетті. Себебі көбінесе адамдар алғашқы медициналық көмек көрсету жөніндегі білімінің жоқтығынан жанындағы адамдарға, кейде  тіпті туысы, танысы немесе досына көмек  көрсете алмай жатады. Мамандар сондай-ақ көлік апаты кезінде, аяғы не қолы сынған сәтте қандай әрекет жасау, вена мен артерия қан тамырларының айырмашылығы, қанды қалай тоқтату, көз қарашығының жарық сезгіштігін, тамыр соғысын қалай байқау, т.б. көптеген әдіс-тәсілдерді іс жүзінде көрсетті. 

Мұндай әдістемелік сабақты жиі ұйымдастырып отырамыз. «ҚТЖ ҰК» АҚ Магистральдық желі дирекциясының бас инженері К. Урынбаевтың хатына сәйкес, жыл аяғында қорытынды шара өткіздік. Оған көптеген теміржолшылар, жауапты мамандар қатысты. Өйткені, төтенше жағдайлар кезінде апаттың алдын алу не аман қалу адамдардың әрекет етуіне, яғни құтқару біліктілігіне де байланысты. Сондықтан осындай әдістемелік сабақ өткізген облыстық ТЖД мамандарына үлкен ризашылығымды білдіреміз, - дейді Атырау магистральдық желі бөлімшесінің азаматтық қорғаныс және төтенше жағдайлардың алдын-алу бөлімінің жетекші инженері Ақзия Сисенова. 

Шара соңында азаматтық қорғаныс пен төтенше жағдай саласында жақсы жұмыс істеген мамандарға бөлімше басшысының атынан Алғыс хат табыс етілді.