Жұмысшылар қауіпсіздігі маңызды

Астана жол дистанциясында 2 ақпан мен 2 наурыз аралығында «Назар аудар, жолда адам!» айлығы өтуде.

Айлықты өткізудегі басты мақсат – пойыздар қозғалысымен байланысты еңбек ететін жұмысшылардың технологиялық жұмыс тәртібін бұзуының алдын алу. Іс-шараны өткізу барысында оны дұрыс ұйымдастыру бойынша нұсқаулықтар беріліп, барлық айналымдар мен телімдерде айлық туралы ақпараттық хабарландырулар ілінді. Еңбек қорғау және қауіпсіздік қызметі мамандары тарапынан технологиялық үдерісті сақтау бойынша жоспардан тыс тексерулер өткізіледі. Тексеру аптасына екі рет өткізіліп, соның барысында анықталған жайттар бойынша акт толтырылады.  

Ал диспетчерлер қандай да бір ескертулер бойынша жан-жақтан, атап айтқанда локомотив бригадаларынан, станция кезекшілерінен, пойыз диспетчерлерінен келіп түсетін ақпараттарды беру тәртібін қатаң сақтауды қамтамасыз етуі керек.  

Локомотив бригадаларынан аса мұқият болып, қауіпті бірден хабарлау, ДУ-46 журналында өндірістегі ескертулерді уақытында жазып отыру, келесі жолда пойыз өткенде жұмысты тоқтату, жұмысшылардың вагондар астынан өтуіне жол бермеу, жалғыз жұмысшының бағыттама бұрмаларын қардан тазалауына жол бермеу, қалың тұманда белгі беру бригадаларын бөлуді қадағалау, аралық жолдарда пойыздар өткенде жұмыс істеп тұрған жол техникасының қызмет көрсету персоналының жол арасында жүруіне жол бермеу, теміржолшылардың арнайы жұмыс киімі және құралдарының түгел болуын қадағалау және басқа да ережелерді қатаң сақтау талап етіледі.