Адам өмірі бәрінен қымбат
Маңғыстау облысы бойынша меншікті тілші
Соңғы екі жылда Маңғыстау темір жолының Үстірт және Боранқұл станцияларында пойыздың адам басу фактісі тіркелді. Екі жағдайда да бөгде адамдар, жолға шығып кетіп, біреуі сол сәтте ажал құшса, екіншісі екі аяғынан айрылған.
Міне, осындай оқиғалардың алдын алу үшін теміржолшылар халықпен түсінік жұмыстарын жүргізуге баса назар аударып отыр.
– Соңғы кездері Маңғыстау өңірі бойынша адамдардың темір жолға шығуы жиілеп кетті. Көбіне жас балалар жүреді. Әңгіме жазалауда емес, адам өмірін сақтауда. Адам өмірі бәрінен қымбат. Осы бағытта аудан әкімдіктері, желілік полиция бөлімімен бірлесіп тұрғындармен және мектеп оқушыларымен талай кездесу ұйымдастырдық. Жолдың қауіпті аймақ екендігін және арнайы жаяу жүргіншілер өтуге арналған өткелден өткенде де абай болу, арнайы ережелерді сақтауды ескерттік. Ауылдарды аралау әлі де жалғасуда. Бүгінге дейін бірқатар мекемеде болып, бейнеролик, суреттер, көрнекілік құралдарымен тақырыпты тереңірек ашып, барынша ашық мағлұмат беруге тырыстық.
«Жаяу адам өткелі», «Сақ болыңыз!», «Темір жол – қауіпті аймақ!», «Пойыздан сақтан!» «Ата-аналар, қауіпті аймақта баланы қараусыз қалдырмаңыз!» деген баннерлерді барлық жерге іліп қойғанбыз, – деген жол шаруашылығы ревизоры Бисембай Жалмұқановтың айтуынша, алдағы уақытта осы бағыттағы кездесулерді теміржолға жақын Болашақ ауылының №10, Теңге ауылының №17 орта мектептері мен Жаңаөзен қаласының №5 гимназиясы, Қарақия станциясындағы және Боздақ бекетіндегі бастауыш мектептеріне, Шетпедегі №2, №1 білім ордаларына, Жетібай станциясында №5, Маңғыстау станциясындағы №1, №5 мектептерде өткізу жоспарланған.
Сондай-ақ ревизорлар теміржол өткеліндегі соқтығысудың алдын алу үшін автокөлік жүргізушілерімен де профилактикалық жұмыстар жүргізіп жатыр. Маңғыстау-Жаңаөзен аралығындағы 13-шақырымның өткелінде жол-көлік оқиғасы жиі тіркелетін көрінеді. Көлік жүргізушілері жол ережесін сақтамай, сол баяғы «үлгеріп өтіп кетемін» деген пәлсапаның құрбаны болатыны айтпаса да түсінікті. Теміржолшылар Жол полициясымен бірігіп рейдтерге шығып, өткелдерде ауқымды профилактикалық жұмыстар жоспарлап отыр.