Теміржолшыларға қолайлы жағдай жасалуда

Маңғыстау магистральдық желі бөлімшесінде жұмысшыларға еңбекте қолайлы жағдай қалыптастыру, жұмыс орындарының эстетикалық және өндірістік тұрғыдан тартымдылығын арттыру бағытында біраз жұмыс атқарылыпты.

Бөлімшенің ғимараттар мен инженерлік жүйелер бөлімінің басшысы Нұржан Мүсірхановтың айтуынша, жалпы еңбек жағдайын жақсарту, қолданыстағы ғимараттардың тозған, бүлінген материалдарын жаңасына ауыстырып, құрылыс жүргізу жұмыстары кезең-кезеңімен іске асырылып отыр. Өткен жылы 17 ғимарат ағымдық жөндеуден өткізілген, биыл бөлімше бойынша барлығы 32 ғимаратты жөндеу жоспарланып отыр екен.  

Бүгінде біреуінде қажетті жөндеу жұмыстары басталып кеткен. Қалған ғимараттарға да не керек, қандай жөндеу қажеттігі бойынша тізім жасалған. Осы айдың соңына дейін 19 ғимаратқа жөндеу туралы рұқсат алынып, келісімшарты жасақталады. Биылғы жоспарланған ағымдық жөндеу кезінде нысандардың, оның ішінде өндірістік, әкімшілік, басқа да түрлі ғимараттың әрқайсысы қажеттігіне қарай әртүрлі жөндеуден өтеді. Яғни нысандардың сырты мен ішін әрлеу, есік-терезесін ауыстыру, қабырғаларды сырлау, еденін, жылыту жүйелерін ауыстыру, жуыну бөлмелерін жаңартып, жабдықтау сынды жұмыстар істеледі, – дейді Н.Мүсірханов.

Санитарлық-тұрмыстық жағдайды жақсарту және еңбекті ұйымдастыруды жоғарылату мақсатында қолға алынып отырған жұмыстар бір бұл емес екен. Былтыр жұмысшыларға арналған 4 модульді-блоктық ғимарат орнатылса, осы жылы тағы бесеуін алу жоспарланған.  

Жұмысшылардың жұмыс орны талапқа сай, таза, қолайлы болса, жұмысшыға да жағымды көңіл күй сыйлап, ынта-жігері арта түсетіні белгілі. Ал модульдік-блокты ғимараттармен қамтылу деңгейіне келсек, бөлімше аумағында қазірге дейін мұндай 60 нысан бар. Осы жылы тағы да Сайөтес станциясына екеуін, Ақжігіт станциясына да екеуін, Маңғыстау станциясына біреуін қою жоспарланып отырған көрінеді. Бөлім бастығының айтуынша, модульдік нысандар жұмысшылардың көңілінен шығады, жұмыстың арасында тынығып, дем алып, тамақтанып, бел жазатын сүйікті орнына айналған.