Теміржол өткелдерінде профилактикалық рейдтер жалғасуда

«Қазақстан темір жолы» ҰК» АҚ Мемлекет басшысының бастамасымен жүзеге асырылып жатқан «Заң мен тәртіп тұжырымдамасы шеңберінде «Қауіпсіз өткел» және «Қауіпсіз темір жол» республикалық профилактикалық акциясын өткізуде.

Қазақстанның барлық өңірлерінде көлік полициясы департаменті, аумақтық полиция бөлімшелері, көлік прокуратурасы мен жергілікті атқарушы органдардың қатысуымен ұйымдастырылып жатқан рейд барысында теміржол өткелдері мен теміржол инфрақұрылымы объектілеріндегі заң бұзушылықтардың алдын алуға басты назар аударылуда. Теміржолшылар көлік жүргізушілерге өткелдерді кесіп өту ережелерін, жаяу жүргіншілерге тек белгіленген жерлерден ғана өту қажеттілігін, ал ата-аналарға балалардың қауіпсіздігі үшін жауапкершілік арқалайтынын ескертеді. Темір жолға жақын жүрудің, жол бойында ойнаудың қауіптілігі және вагондар мен байланыс желісінің объектілерінде селфи жасау әрекеттерінің салдары түсіндірілуде.  

Акция аясында ұйымдастырушылар теміржол өткелдерінде рейдтер, автомектептерде профилактикалық дәрістер, автокөлік кәсіпорындарының жүргізушілерімен кездесулер өткізіп, пойыз жолаушыларымен және темір жолдың жанында орналасқан елді мекендердің тұрғындарымен әңгімелесе отырып, темір жолдың қауіпті аймақ екенін еске салады. Қатысушыларға ақпараттық жадынамалар таратылып, қауіпсіздік ережелерін сақтау бойынша сұрақтарға жауап беруде.  

Профилактикалық жұмыстың жеке бағыты жолаушылар пойыздарында да жүргізілуде. Көлік полициясымен бірлесіп рейдтер ұйымдастырылып, жолаушыларға жолда жүру ережелері, жеке қауіпсіздік шаралары және қоғамдық тәртіпті бұзғаны үшін жауапкершілік түсіндіріледі.  

ҚТЖ теміржол инфрақұрылымындағы келеңсіз оқиғалар санын азайтуға, қауіпсіз мінез-құлық мәдениетін арттыруға және азаматтардың өмірі мен денсаулығын сақтауға бағытталған жүйелі профилактикалық жұмысты жалғастыруда.