Техникалық тексеріс жалғасуда
Маңғыстау облысы бойынша меншікті тілші
Маңғыстауда «Заң мен тәртіп» қағидаты аясында «Қауіпсіз теміржол өткелі» акциясы жалғасуда. 16-22 шілде аралығына жоспарланған акция аясында сала мамандары теміржол өткелдерін аралап, техникалық жай-күйін тексеріп жатыр.
Бүгінге дейін Маңғыстау жол дистанциясына қарасты 34 теміржол өткелінің жартысынан астамы тексерістен өтті.
– ЦРБ Давлетовтың №87 А жеделхатын орындау мақсатында Маңғыстау жол дистанциясына қарасты барлық теміржол өткеліндегі құрылғылардың жұмысқа жарамдылығы бойынша бақылау жұмыстары жүргізіліп, аталған нысандардағы құрылғылардың жұмыс істеу қабілеті тексерілуде. Өткелдердегі қауіпсіздікке сырттан келетін қауіп-қатердің алдын алу бағытында да тиісті шаралар атқарылуда. Шілденің 16-22 аралығында Жаңаөзен қаласы мен Қарақия, Мұнайлы, Маңғыстау аудандарының аумағында осындай профилактикалық жұмыстар жүргізілді. Жергілікті әкімдіктерге қызметкерлерінің қатысуын және ақпараттық қолдау, тұрғындар мен темір жолға жақын орналасқан мекемелерге түсінік жүргізуі жөнінде хат жолдадық. Жергілікті ішкі істер бөлімдеріне де бірлескен рейд ұйымдастыру туралы хат жолдап, іске кірісіп жатырмыз, – дейді бұл туралы Маңғыстау жол дистанциясының жетекші жол инженері Мұхтар Кульчанбаев.
Оның айтуынша, өткелдердегі тексерістер барысында нысандағы автоматты дабыл құрылғыларының жарамдылығы, дыбыстық дабылдың жұмыс қабілеті, байланыс пен радиобайланыстың барлық түрлерінің жарамдылығы, тосқауыл құрылғылары мен автоматты шлагбаумның жай-күйі, өткелдердің жарықтандырылуы, техникалық құжаттаманың болуы, дұрыс жүргізілуі сынды техникалық талаптардың орындалысы мен жұмыс процесі қадағалануда. Сондай-ақ күзетілетін теміржол өткелдерінің ауысым қызметкерлеріне қоршау құрылғыларын пайдалану мәселелері бойынша техникалық сабақтар өткізіліп, стандартты емес жағдайлардағы іс-қимыл тәртібін түсіндіру жоспарланған. Бүгінге дейін Жаңаөзен қаласы мен Қарақия, Мұнайлы аудандары аумағындағы өткелдерде аталған жұмыстар жүргізілді.