Семей локомотив пайдалану депосының ұжымы «Құрметті теміржолшыларды» зейнетке шығарып салды

Жуырда Семей локомотив пайдалану депосында аға буын өкілдерін құрметті демалысқа шығарып салу рәсімі болып өтті. Бұл жолғы шара бұрынғыдан ерекше. Себебі, ұжым қошеметімен зейнеткерлікке бара жатқандардың екеуі – «Құрметті теміржолшы» төсбелгісінің иегерлері. Айта кетерлігі, Семей өңірі қазіргі таңда эпидемиологиялық ахуал бойынша «жасыл аймақта» тұрғандықтан әрі депо қызметкерлерінің 99 пайызы вакцинациялаудан толық өтуіне байланысты шағын топқа жиын өткізуге рұқсат берілген. Салтанатты шара барысында ТЧЭ-24 басшысы Болат Сейілханов сөз алып, депоға қырық жыл еңбек сіңірген машинистерге жылы лебізі мен алғысын білдірді.

– Семей локомотив пайдалану депосының ұжымы мен кәсіподақ комитеті құрметті демалысқа шығу қуаныштарыңызбен құттықтап, темір жол көлігіндегі адал еңбектеріңіз және өндірістегі табыстарыңыз үшін алғысымызды білдіреміз. Темір жол саласына сіңірген ерен еңбектеріңіз өлшеусіз, – деген Болат Мұхарамұлы «су жаңа» зейнеткерлерге зор денсаулық тіледі.

Ыстық лебіздер мен тебіреніске толы тілектерін жаудырған әріптестер қос бірдей Құрметті теміржолшы-машинистің қатар зейнетке шығуы депо тарихында болмағанын да атап өтті. Бәріне ұстаз болып, талай машинисті тәрбиелеп өсірген олар қандай құрметке де лайық десті бірауыздан. Өз кезегінде әріптестері алдында сөз алған Қайрат Жұмаханов пен Ерлан Сәрсекенов, сондай-ақ, машинист көмекшілері Қайрат Алғожанов пен Қуаныш Мұңсызбаев та ұжым мүшелері мен басшылыққа ризашылықтарын білдіріп өтті. Олардың барлығына да салтанатты түрде алғыс хат пен естелік сыйлықтар табыс етілді. Салтанатты шара соңында барша ұжым мүшелері естелік суретке түсті.