Уәкілетті орган өкілдері кәмілетке толмағандарға жол қауіпсіздігі мен қылмыстан сақтану ережелерін түсіндірді
Биылғы 18-22 қазан аралығында Тараз станциясы желілік полиция бөлімшесінің қызмет көрсету аумағында «Тоқтаңыз! Басып кету қаупі бар!» акциясы өтті, деп хабарлайды Rail-news.kz. Шараға теміржолшылармен бірге Жамбыл көлік прокуратурасының, «Nur Otan» партиясы жергілікті филиалының, өңірдегі білім беру орындары мен денсаулық сақтау мекемелерінің қызметкерлері тартылды. Желілік полиция бөлімшесінің аға инспекторы, полиция майоры Лаура Көпбаеваның айтуынша, акция Тараз станциясының аумағында пойыздардың адам басып кету фактілерінің алдын алуды мақсат етеді. Сондай-ақ балаларға теміржолдағы қауіпсіз жүріс-тұрыс ережелерін ескертуді, жасөспірімдер қылмыстарының алдын алуды, кәмелетке толмағандардың арасында әкімшілік құқық бұзушылықтарды анықтауды, олардың түнгі мезгілде жалғыз-жарым жүруін болдырмауды көздейді.
«Акция кезінде, әсіресе жеткіншектерге теміржолдағы қауіпсіздік ережелерін таныстырдық, қауіп-қатерді жан-жақты түсіндіріп, тәжірибе жүзінде де көрсеттік. Сонымен қатар кәмелетке толмағандарға алкогольдік ішімдік, темекі өнімдерін сату фактілері анықталды. Ондай сауда нысандарының жолын кесіп, балалардан заңсыз сақталатын заттарды тәркіледік», – деді Л.Көпбаева.