Дегелең – Жаңа-Семей телімі бойындағы 10 шақырымдық аумаққа қоршау салынды

Бүгінде Семей магистральдық желі бөлімшесіне қарасты барлық жол дистанцияларында қысқа даярлық шаралары толық аяқталды. Соның ішінде қос бағытта қызмет көрсететін ПЧ-39 мекемесінің жолшылары ауқымды іс бітірді. Білікті басшы Рахат Ботаспаевтың басшылығымен жергілікті жолшылар қауымы жыл ішіндегі жоспар аясында Дегелең-Жаңа-Семей телімі бойындағы 10 шақырымдық аумақтың мал қоршауын шаруашылық тәсілмен салып шықты. Атап айтсақ, Көл-Талды, Жалпақ-Талды станцияларының аралығындағы желі бойында жаңадан қоршау салынды. Жалпы, осы аумақ бойынша желінің қос қапталындағы мал қоршауы 64 шақырым болатын. Бұл аздық етуде. Себебі, телім бойында жылдамдығы аса жоғары Алматы-Павлодар, Өскемен-Нұр-Сұлтан, Семей-Нұр-Сұлтан сынды жолаушылар пойыздары қатынайды. Бұдан өзге Қаражыра көмір кенішінен тәулігіне ең кемі 4 жүк пойызы жолға шығады. Ал, желінің қос қапталында негізінен шағын малды ауылдар, шаруа қожалықтары мен қыстақтар орын тепкен. Сондықтан басшылықтың ұйғарымымен мал қоршауын жыл сайын ұлғайту көзделген болатын.

– Жаңадан он шақырым қоршаудан бөлек, бұрынғы 64 шақырымдық мал қоршауларының жекелеген аумақтарына жөндеу жұмыстары жүргізілді. Кейбір тұстарын қайтадан жаңарттық. Енді төрт түліктің жолға шығып кету фактілерінің алдын алу бойынша ескерту, түсіндіру жұмыстарына күш салатын боламыз, – дейді ПЧ-39 бас инженері Мырзабек Керейбаев.