Атырау жүк тасымалы бөлімшесі бойынша 9 айда 114 малды пойыз қаққан

Атырау жүк тасымалы бөлімшесі бойынша өткен 9 айда мал басудың 52 оқиғасы тіркелген. Жалғыз-жарым мал емес, тобымен басылып, 46 сиыр, 52 жылқы, 15 түйе – барлығы 114 бас мал шығын болған, деп хабарлайды Rail-news.kz. Ал локомотивті шұғыл тежеу 190 рет орын алған. «Мал ашуы – жан ашуы» дейтін халықпыз ғой, әйтсе де, мал иелерінің малға бақташы қойып не бақылауда ұстамаса, жағдай ушығып барады. Иелері табылған малдарға айыппұл салынса, табылмағандары жазадан сытылып кетіп отыр. Темір жолдың қауіпті аймақ екенін түсіндіру бойынша 578 адамды қамтыған теміржолға жақын орналасқан елді мекен тұрғындарымен кездесу, 103 рейд өткен. Адамдар көп өтетін жерде қауіптілікті ескертетін 25 жол белгісі орнатылған. Полиция өкілдері мал басылған жағдайда машинистер оқиға орнын суретке түсірсе деген ұсыныс айтады. Бірақ бөлімше басшылығы машинистің міндеті – діттеген жерге пойызды қауіп-қатерсіз жеткізу, оның басқалай шаруамен айналысуға құқы жоқ екенін ескертті.