Күзгі комиссия Шымкент магистральдық желі бөлімшесі бойынша 1625 кемшілікті анықтады
Шымкент қаласы бойынша меншікті тілшісі
Шымкент магистральдық желі бөлімшесі күзгі байқауда жол, СОБ және байланыс құрылғылары, электрмен жабдықтау шаруашылықтарын тексеру барысында 1625 кемшілікті анықтады. Оның ішінде ең көп ескертуді жол шаруашылығы алған. Белгі беру және байланыс шаруашылығы мен электрмен жабдықтау және вокзал шаруашылығы бойынша да көптеген кемшіліктер анықталып, жойылды. Жалпы күзгі байқауда өндірістік ғимараттарды ұстау, еңбекті қорғау, электр және өрт қауіпсіздігі, экология мәселелерін анықтау өте маңызды болды. Комиссия барлық станцияларда бағыттамалардағы ақауларды анықтады. Мәселен, 31 бағыттамалы бұрма жабылып, 32 бағыттамалы бұрмадағы жылдамдық шектелді. Өткелдердегі жарамсыз шпалдар, бағыттамалы бұрмалардағы типтік емес болттар, рельстер мен өзекшеде және жақтауда балқымалардың болмауы, крестовиналар және басқа да ақаулар жойылып, қалпына келтірілді. Станция бойынша рельстік тізбектерге қызмет көрсету, электр жетектерін, жол қораптарын, жалғастырушы муфталарды тазалау жұмыстары тексеріліп, қанағаттанарлық деген баға берді. Қызылсай станциясы бойынша Н-1 сигналының ақауы, түйіспелі жалғағыштардың болмауы тез арада жойылды. Сондай-ақ, комиссия СОБ және байланыстың жекелеген желілік қызметкерлерінің құрылғыларға қызмет көрсету бойынша технологиялық процестердің талаптарын толық көлемде білмейтіндігін анықтады. Арыс белгі беру және байланыс дистанциясында көбіне технологиялық процесс бұзылатыны, яғни жұмысшылардың міндетін бақылау әлсірегені байқалды. Салдарынан СОБ, КТСМ, байланыс және радиобайланыс құрылғыларына қызмет көрсетуде қызметкерлермен техникалық сабақтар бақыланбаған. СОБ аспаптарына уақтылы техникалық қызмет көрсетуге бақылау белгіленбеген. Шымкент электрмен жабдықтау дистанциясы бойынша 262 ескерту анықталды. Жылға, Монтайтас, Арыс-1, Арыс-2, Бадам, Шымкент, Манкент, Түлкібас станциялары бойынша ескертулер көп. Күзгі комиссия анықтаған кем-кетік бүгінде жойылып жатыр. Жол дистанциясы басшыларына жол сапасын көтеру, станциялар мен өткелдердегі түйіспесіз жолдарды күтіп-ұстауды қолға алу, жарамсыз шпалдарды ауыстыру тапсырылды. Ал белгі беру және байланыс дистанциясына құрылғыларға және станция бойынша рельстік тізбектерге сапалы қызмет көрсету тапсырылды. Ал электрмен жабдықтау дистанциясына ластанған секциялық оқшаулағыштарды тазалау тапсырылды.