Шығыстағы нысандарға коммуналдық-тұрмыстық қажеттілік үшін 440 мың тоннадан астам көмір жеткізілген

Бүгінгі таңда ел шығысын көмірмен қамту мәселесі толық қуатында жүзеге асырылуда. Мәселен, өткен қыркүйек-қазан айларында аймақтағы барлық қазандықтар мен теміржолдың тұйық желілеріне коммуналдық-тұрмыстық қажеттілік үшін 440 мың тоннадан астам көмір жеткізілген. Теміржол көлігімен тасымалданған бұл жүктің көрсеткіші, жоспардан 129 пайызға артық орындалып отыр. Осы ретте ҚР Индустрия және инфрақұрылымдық даму министрлігінің мәліметіне сүйенсек, өңірге қазан айының өзінде ғана 232 мың тоннадан астам қатты отын жеткізілген. Ал қыркүйекте 213 мың тоннадан астам көмір толықтай теміржол арқылы тасымалданды. «Қазіргі таңда Қазақстанда әртүрлі меншік иелерінің 63 мыңнан астам вагоны бар. Олардың 55%-ы маусым жүгін тасымалдауға жұмылдырылған. Бір ғана «Қазтеміртранс» АҚ қатты отынды тасымалдау үшін 13 мыңнан астам ашық вагонды ұсынып отыр. Бұл қазіргі парктің 66%-ын құрайды», – делінген аталмыш ақпаратта. Осыған дейін мәлім етілгендей, «Қазақстан темір жолы» ұлттық компаниясы әкімдіктер мен жүк жөнелтушілерден халық арасында дүрбелең тудырмас үшін көмір дайындауды алдын ала ұйымдастыру туралы бірнеше рет өтініш білдірген болатын. Сонымен қатар көмір кеніштерінде ашық вагондардың бос тұрып қалуына жол бермей, тиеу мерзімдерін сақтау ұсынылған еді. Қазіргі таңда Семей ЖТ бөлімшесі бойынша аталмыш бағытта кешенді түрде жұмыстар жүргізілуде. Бұл ретте жергілікті теміржолшылар үшін кестеден ауытқу жоқ және тосын кедергілер туындамаған. Вагон жетіспеушілігін шешу мақсатында алдын ала іс-шаралар қабылданған. Дегелең станциясы мен Жаңа-Семей жүк станция- сындағы жұмыс барысы аса қауырт болса да ретімен жүріп жатыр. Айта кетейік, ҚТЖ-ның орталық аппаратында көмір тасымалдау бойынша штаб, ал бөлімше бойынша арнайы мониторингілік топтар жұмыс істейді. Олар кірме жолдардың иелерімен бірлесіп стратегиялық жүкті жеткізу мәселелерін жедел шешу үшін шұғыл шешім қабылдауда. Бұл орайда теміржолшылар қауымы жергілікті атқарушы билік өкілдерімен, көмір саудалаушы компания өкілдерімен бірлесе жедел әрекет етуде. Мәселен, Семей станциясымен әріптестік орнатқан «Жігер» ЖШС тұйық желісіне тәулігіне орта есеппен алғанда 15-20 вагон көмір жеткізіледі екен. Әлеуметтік көмір алушылар алдын ала жазылатындықтан мұнда қазір қарбалас жоқ. Қазір көмірдің тоннасы Семейде 9,8 мың теңгеге, Өскеменде 10,9 мың теңгеге сатылып жатыр. Бұл республикамыздағы ең төменгі баға болып саналады.