Жолаушылар сұранысына байланысты Атыраудағы пойыз кестесі өзгерді

Облыс орталығынан шалғайдағы Құрманғазы ауданына, Атырау мен Дина Нұрпейісова станциялары аралығында қатынайтын пойыз кестесі өзгерді. Бұл жолаушылардың сұранысына байланысты болып отыр деп хабарлайды тасымалдаушы «Otpan Logistic» компаниясының өкілдері. Ендігі жерде, яғни 7 қарашадан бастап жергілікті пойыз Атырау станциясынан кешкі 18:10-да қозғалып, соңғы аялдама Дина станциясына 00:36 минутта жетеді. Ал кейін қарай 1:16-да жүріп, таңертеңгі 7:39-да Атырауға келеді. Оның себебі жол-жөнекей ауыл, ауданнан облыс орталығы Атырау қаласына қатынаған жұртқа ыңғайлы екен, яғни пойыздың таңертең келуі қолайлы, кешке дейін бар шаруасын бітіріп пойызға отырғандар діттеген жеріне ел жатпай жетеді. Ал бұрын түнгі бірде келетін. Айта кетейік, Атырау – Аққыстау – Ганюшкино – Д.Нұрпейісова бағытындағы №631/632 пойыз құрамында төрт вагон: 54 орындық 1 плацкарт және әрқайсысы 81 орыннан үш жалпы вагон бар. Жалпы вагонға билет құны соңғы станцияға дейін 895 теңге болса, плацкарт – 2475 теңге. Пойыздың станцияларға тұру уақыты әр түрлі, Исатай және Құрманғазы аудандарындағы шағын разъездерге 1, 2 минуттан, ал үлкен станцияларға 4 минут аялдайды.