Ақтөбе станциясындағы желілік полиция бөлімінде «Тәуелсіздік – тірегім» атты дөңгелек үстел өтті

Тәуелсіз елдің ұлы – өжет, қызы – қайратты, халқы қаһарман болуы тиіс. Оның құнын бағалау – бүгінгі ұрпақтың басты парызы. Осындай зор рухты күш беретін тәуелсіздіктің құнын насихаттаған шара Ақтөбе станциясындағы желілік полиция бөлімінде өтті. «Тәуелсіздік – тірегім» атты дөңгелек үстелге желідегі тәртіп сақшылары мен станция қызметкерлерінен бөлек Ақтөбе қаласының ішкі саясат және жастар ісі жөніндегі басқармасының мамандары, ардагерлер арнайы шақырылды. Көліктегі полицейлер арасында тәуелсіздіктің құрдастары да баршылық. Бөлімше тергеушілері Гүлбақыт Әлимаханова, Тимур Аймұханов, полиция майоры Абылайхан Өтеуов, полиция аға лейтенанты Мырзахан Кажниязов, жедел криминалистикалық тобының криминалисі Іңкәр Кенекбаева және патрульдік полиция тобының полицейі, аға сержант Жантай Алмағанбетовтер тәуелсіздік таңы атқан жылы өмірге келгендерін мақтаныш етеді. Олар аға буынның еңбек жолын абыроймен жалғастырып келеді. – Тәуелсіздік – азаттықтың алтын діңгегі, ұлттық өрлеудің ұлы күші. Оны жастардың бағалай білуіне ықпал етуіміз қажет. Кез келген ұлттың қолы жете бермейтін тәуелсіздігімізді көздің қарашығындай сақтау – әрбіріміздің қасиетті борышымыз, – деп сөз сөйлеген Ақтөбе станциясы ЖПб бастығы, полиция подполковнигі Айбек Бекжанов жастарды елін-жерін сүйіп, отаншылдық рухты арттыруға шақырды. Шара ұлт тарихында өшпес із қалдырған тарихи тұлғалардың еңбегін насихаттауға ұласты. Батыс аймақтық көліктегі полиция департаменті ардагерлер кеңесінің төрағасы Сабит Садықов Президенттің "Тәуелсіздік бәрінен де қымбат" мақаласын тілге тиек етіп:

"Тәуелсіздік – қазақ халқының, Қазақстан халқының басына біткен бақ. Бұл – еш уақытта маңызы жоғалмайтын, ғасырлардан ғасырларға ұласатын үлкен құндылық. Әрбір Қазақстан азаматы соның қадір-қасиетін білуі керек. Қазақ халқының ұзақ тарихи кеңістікте өмір сүруі, этнос ретінде, ұлт ретінде сақталуы тәуелсіздікке тікелей байланысты және ол – ұлтымыздың келешегін қамтамасыз ететін құбылыс", – деді.