Атырауда пойызды шұғыл тоқтатуға мәжбүрлейтін жағдайлар азаймай тұр

Атырау жүк тасымалы бөлімшесінде биыл қозғалыс қауіпсіздігінің өрескел бұзылу оқиғасы тілкелмеген. Өткен 10 айда өндірістік жарақат алу жағдайы да болмаған. Бұл, әрине, ең алдымен қауіпсіздік пен еңбек қорғауды қамтамасыз ету бағытында жүргізілген кешенді жоспарлы іс-шаралар нәтижесі екені анық. Сонымен қатар, басшылар тарапынан кенеттен тексеру жүргізу, станцияларда жұмысшылармен технологиялық процесті, қауіпсіздік техникасының ережелерін сақтауды қадағалауы да оң әсер еткен. Алайда, бөлімше аумағында тепловоздардың шұғыл тежеу беруі кемімеген, керісінше артып кеткен. Өйткені темір жол бойында иесіз жүрген мал көп. Атырау жүк тасымалы бөлімшесі бойынша 10 айда 60 мал басу оқиғасы тіркелген. Темір жолдағы желілік полиция дерегінше, мал әсерінен локомотивті шұғыл тежеудің екі жүзден астам оқиғасы тіркеліп, пойызға басылған мал саны 122-ге жеткен. Оның ішінде 48 сиыр, 56 жылқы, 17 түйе бар. «Жол бойына малдың шығып кетуі теміржолға үлкен кедергі келтіруде. Машинистер еріккеннен тоқтай ма, шұғыл тежеу – шарасыздың ісі, жолға шыққан адамды немесе малды баспаудың амалын қарастырып, лажсыз оқыс тежеу береді. Шұғыл тежеудің өз зияны бар – тепловоз тұрып қалады, бүлінеді, уақыт кетеді, вагон аударылу, жолаушылар жарақат алу қаупі бар. Сондықтан, халық малға ие болуы керек дегенді түсіндіре алмай-ақ қойдық» деп шарасыз бас шайқайды бөлімшенің бас инженері Б.Картан.