ҚТЖ мен Қазкөліккәсіп өкілдері қызылордалық теміржолшылармен кездесті
Қызылорда облысы бойынша меншікті тілші
Ел Тәуелсіздігінің 30 жылдық мерейтойын Ұлттық компания теміржолшылары кең көлемде атап өткелі отыр. Теміржолшылардың жоғары марапаты жыл сайын 65 адамға беріліп келсе, биыл бұл атаққа қосымша тағы 30 теміржолшы ие болады және марапатқа қоса берілетін сыйақы көлемі екі есеге өседі деп күтілуде. Бұл туралы «ҚТЖ» ҰК» АҚ басқарма басшысының HR және корпоративтік сауалдар жөніндегі орынбасары Серік Кеулімжаев пен «Қазкөліккәсіп» ҚБ төрағасының орынбасары Ж.Сәбитов бастаған жұмыс тобының аймақ теміржолшыларымен кездесуінде белгілі болды. Сыр бойына келген жұмыс тобы өкілдері Қызылорда локомотив пайдалану депосының мәжіліс залында теміржолшылармен пікірлесіп, ұсыныстарын тыңдады. Компанияның теміржолшылар алдындағы жауапкершілігін кеңінен түсіндіруге келген жұмыс тобы мүшелеріне сала еңбеккерлері де көкейдегі сауалдарын қойып, жауап алды. Сауалдар әртүрлі тақырыпта болды, кейбіріне жауап беру жұмыс тобының да құзыретіне кірмейтіні анық еді, дегенмен басшылық ақылдасып, ойласып, мүмкіндігінше оң шешімін табуға мүдделі екендерін білдірді. Мәселен, депо маңында орналасқан көпқабатты ғимараттың тұрғын үй ретінде жұмысшыларға беру мүмкіндігін жасау, ерте зейнетке шығудың ерекшелігі мен пайдасы, машинистердің қателік жасап жұмыстан төмендетілген жағдайда қайта орнына бару тәртібін белгілеу, аутсорсингке берілетін жұмысшылар жалақысының сақталу мүмкіндіктерін қарастыру, диспетчерлік қызметтің әсерінен орын алатын олқылықтың алдын алу және осы мақсатта Қызылорда-Белкөл учаскесіне қызмет көрсететін Ақтөбедегі пойыздар қозғалысын басқару орталығы (ЦУП) диспетчерлермен кездесіп түсіндіру жұмыстарын ұйымдастыру, ротация әсерінен туындайтын қиындықты оңтайлы шешу үшін бөлімшеде шұғыл басқару бөлімі ашылса деген ұсыныс-пікірлер болды. Жұмыс тобының өкілдері жолданған сау- алдарға барынша жауап беріп, кейбірі жиын хаттамасына енгізіліп, құзырлы орындарда талқыланатыны айтылды. Кей аймақтардың ауа-райы ерекшелігіне қарай қосымша төленетін үстеме ақының төленуі, теміржолшының маусымдық киім-кешекпен қамтылып, жұмыс орнының қолайлығын қамтамасыз етуде басшылық құрамның рөлі, мекеме басшыларының бір күнді қоғамдық қабылдау күні ретінде белгілеп, жұмысшылармен кездесу ұйымдастыруы, тағысын тағы мәселелер сөз болды.
– Кейбір шағын станциялардағы ауа-райы- ның қолайсыздығына байланысты берілетін жеңілдіктер алдағы уақытта бекет басшысы мен жол шеберінің жазбаша түрде хабарлауы арқылы қабылданып, үстеме ақы төлену жайы шешілетін болады. Жалпы компания үшін әрбір теміржолшының еңбек жағдайының тиісті деңгейде қамтамасыз етілуі маңызды, – деді «Қазкөліккәсіп» ҚБ төрағасының орынбасары Ж.Сәбитов.
Ол Түркістан мен Сексеуіл станциясы ара- сындағы салалық мекемелердің теміржолшыларымен кездескен жұмыс тобының көздеген мақсаты да осы – компанияда жүргізіліп жатқан кешенді жұмыстарды түсіндіріп, халықтың сын-ескертпесі мен ұсыныс-тілегін тыңдау екенін жеткізді. Егер теміржолшыларды толғандырған сауалдарға тұшымды жауап болмаған жағдайда, мәселе жергілікті жерде шешімін таппаса, оны тиісті өкілетті орындарға ұластыру сызбасы көрсетілді, яғни мәселені оңтайлы шешуге жауапты тұлғалардың мағлұматы көрсетілген брошюраның таратылуы халықтың сенімін арттыра түскендей болды. Бұл дегеніміз, компания басшылығы теміржолшылардың әлеуметтік-тұрмыстық жағдайына бей-жай қарамайтындығын білдірсе керек.