Тәуелсіздіктің 30 жылдығын семейлік теміржолшылар сән-салтанатымен атап өтті
Абай облысы бойынша меншікті тілші
Ел егемендігінің 30 жылдығын семейлік теміржолшылар ерекше көтеріңкі көңіл күймен атап өтті. Салтанатты жиын барысында аймақ теміржолының өркендеуіне зор үлес қосқан майталман мамандар марапатталып, құттықтау тілектер ақтарылды. Мерекелік басқосуға сала ардагерлері, желі бойындағы теміржолшылар жиналды. Салтанатты шараны Семей ЖТ бөлімшесі басшысының міндетін атқарушы Ғабит Есқожанов пен Семей магистральдық желі бөлімшесі басшысы Айдын Шәукежанов теміржолшыларды тәуелсіздік мерекесімен құттықтап, егемен елдің игілігі жолында тер төгіп жүрген әрбір теміржолшы қошемет пен құрметке ие екенін жеткізді. Әрине, мұндай салтанатты шаралар марапатсыз өтпейтіні белгілі. Бұл жолы да бірқатар семейлік теміржолшылардың абыройы асқақтады. Атап айтсақ, «Адал еңбегі үшін» төсбелгісімен Ғабит Ғазизұлы және Айжан Оспанова марапатталды. Ал, «Үздік басшы» атағын ПЧ-39 басшысы Рахат Ботаспаев пен ЭЧ-18 мекемесінің директоры Нұрлан Жақсылықұлы, қозғалыс қауіпсіздігі бөлімінің бастығы Дәулет Сүлейменов иеленді. Көптеген теміржолшылар ҚТЖ басқарма төрағасының құрмет грамотасымен марапатталды. Олардың арасында ВЧД-23 мекемесінің кәсіподақ төрағасы Ертай Темірбеков пен ПЧ-40 кәсіподағының төрайымы Зульфия Еникеева, жастар ұйымының жетекшісі Арайлым Қосанова болды. Сонымен қатар, 1986 жылғы Алматы қаласында орын алған Желтоқсан оқиғасына қатысқан төрт теміржолшы құрбы ерекше құрметке ие болды. Ұлттық компания басшылығының Желтоқсан оқиғасының 35 жылдығына арналған арнайы сыйлықтары бөлімшенің логистика және жүк тасымалын ұйымдастыру бөлімінің аға инженері Айтолқын Мұхамедияроваға салтанатты түрде табыс етілді. Зал толы теміржолшылар ержүрек төрт құрбыға қошемет білдіріп қол соқты. Ыстық ілтипатқа толы салтанатты кеш қалалық мәдениет сарайының өнерпаздары әзірлеген мерекелік концертпен әсем жалғастық тапты.