ӘТЖК 100 жылдығына орай Қызылорда жасағының озаттары марапатталды
Қызылорда облысы бойынша меншікті тілші
Биылғы жыл Әскерилендірілген темір жол күзетінің жүз жылдығы атап өтілуде. Күзет қызметінің Түркістан филиалына қарасты Қызылорда жасағының сарбаздары да ғасырлық мерейтойларын салтанатпен атап өтті. Әскерилендірілген темір жол күзеті Түркістан филиалының бастығы Бақтияр Амалдықов пен Қызылорда жасағының жетекшісі Мұхтар Кенжеғұлов күзет қызметінің ардагерлері мен қызметкерлерін мерекемен құттықтап, еңбек озаттарын марапаттады. Бір қызметкер «Адал еңбегі үшін» медалімен, 10 күзетші «Әскерилендірілген темір жол күзетіне 100 жыл» мерейтойлық төсбелгісімен марапатталды. Ішкі істер министрінің Құрмет грамотасы 2 күзет сарбазына табыс етілді. Сонымен қатар, Қызылорда қосалқы бөлімі бастығының Құрмет грамотасы мен Алғыс хатын, Әскерилендірілген темір жол күзеті Түркістан филиалы бастығы мен кәсіподақ ұйымы төрағасының Құрмет грамотасы мен Алғыс хатын иеленген күзет жасағының қырандары үшін бұдан бөлек мерекелік сыйақы берілетіндігі де жағымды жаңалық болды.
– Теміржолдағы күзет саласының 100 жылдық мерейтойы ең алдымен мына отырған ардагерлерімізге тиесілі. Біз осы аға буынға қарап үйрендік, тәжірибе жинақтадық, кәсіби міндетіміздің жауапкершілігін сезіндік. Бәріңізді төл мерекемен құттықтап, еңбектеріңізге табыс тілеймін, – деді Әскерилендірілген темір жол күзеті Түркістан филиалы бастығы Бақтияр Амалдықов.
Сексеуіл мен Түркістан станциялары аралығында темір жол күзетін ұйымдастыратын Қызылорда жасағы жыл басынан бері ешқандай коммерциялық ақаудың орын алуына жол бермеген. Сондықтан әріптес- терін мерейтоймен құттықтаған жасақ бастығы Мұхтар Кенжеғұлов қызылордалық күзетшілердің бәрі де құрметке лайық деді.