Ақтөбедегі теміржол ревизорлары 5 мыңнан астам сәйкессіздікті анықтаған
«Қазақстан теміржолшысы» газетінің тілшісі
«ҚТЖ» ҰК» АҚ-ның ел өңіріндегі ірі филиалдарының бірі Ақтөбе жол бөлімшесі тасымалдау процесінде маңызды рөл атқарып, теміржол көлігінің жұмысын тиімді ұйымдастырып келеді.
Қандыағаш тораптық станциясы бөлімшенің «жүрегі» десек болады. Мұнда автоматты орталықтандырумен жарақтандырылған сұрыптау дөңесі бар, ол тәулігіне шамамен 2,5-3 мың вагонды өңдеп, 22 бағытқа пойыздарды жасақтайды.
Бөлімшенің Дөң станциясы аумағында хром кені өндіріледі, ол әлемде кен өндіру көлемі бойынша екінші орында тұр. Станциядан жыл сайын тиелетін бұл жүк түрінің көлемі шамамен 3-3,5 мың тоннаны құрап, ол Ақтөбе және Ақсу ферроқорытпа зауы- тына жөнелтіледі. Ал бөлімшеде тиелетін жүктің 50%-ға жуығын құрылыс материалдары құрайды. Олар көбінесе Біршоғыр, Мұғалжар, Сарысай, Кемпірсай, Қамыссай, Қаратоғай, Шұбарқұдық станцияларынан жөнелтіледі.
Ақтөбе бөлімшесінің географиялық жағдайы да айрықша, қысқы ауа-райы қатты аяз, қалың қар және боранды бұрқасынымен ерекшеленеді. Әсіресе, Мұғалжар тауының сілемдері созылып жатқан Біршоғыр және Никельтау жол дистанциялары үшін қыс маусымы қатал сынақ, соған қарамастан бұл аумақтың теміржолшылары қауіпсіз және үздіксіз қозғалысты қамтамасыз етуде ешкімнен кемшін қалған емес. Аймақта пойыздардың қозғалыс қауіпсіздігінің толық қамтамасыз етілуін Еркінбек Елғонды жетекшілік ететін Ақтөбе телімі бойынша ревизорлық аппарат бақылауға алған.
Өңірдің бас ревизоры болып еңбек етіп жатқанына жетінші жылға аяқ басқан тәжірибелі теміржолшы жетекшілік ететін ревизорлық аппаратта қызмет етіп жүрген 5 ревизордың қай-қайсысы да өз ісінің кәсіби мамандары. Өткен жылы олар жылжымалы құрам мен техникалық құралдардың жағдайы, инфрақұрылым құрылғыларын пайдалану және күтіп ұстау, пойызды дұрыс басқару, жұмыс барысында технологиялық процестердің талаптарын сақтау бағытында 600-ге жуық тексеріс жүргізіп, 5 мыңнан астам сәйкессіздікті анықтаған.
Сондай-ақ, пайдалану процесіне шектеу қою арқылы қозғалыс қауіпсіздігіне қайшы келетін 600-ден астам өрескел бұзушылықтың алдын алған.