Қазалы вагон пайдалану депосының үздіктері марапатталды
Қызылорда облысы бойынша меншікті тілші
Ақаулы вагондарды анықтауда қазалылық қырағы вагон қараушылар аймаққа танымал. Өткен жылды табысты аяқтаған Қазалы вагон пайдалану депосының майталмандарын марапаттау рәсімі өтті.
Депо бастығы Арғын Орымбаев пен кәсіподақ ұйымының төрағасы Бақытжан Ибрайым еселі еңбегімен ұжым абыройын арттырған жандарға ұжым атынан алғыс айтып, кеудесіне төсбелгі тақты. Депоның өндірістік оқыту шебері Ғабит Төлемісов «Адал еңбегі үшін», ал вагон қараушысы Айбек Өтепбергенов «Кәсібі бойынша үздік» төсбелгісімен марапатталды.
Вагон қараушы-жөндеушілердің үлкен мектебі қалыптасқан ұжымда қозғалыс қауіпсіздігін сақтау ең жауапты міндет саналатындықтан, жылдар өте нағыз мамандар іріктелгені байқалады. Қазалылық вагон қараушылар ай сайын ақаулы вагонды құрамнан ажыратып, қауіптің алдын алғаны жайлы жақсы хабарды жиі еститініміз осының айқын дәлелі емес пе?!