Атыраудағы вокзалдар жаңартылып жатыр
Атырау облысы бойынша меншікті тілші
Атырау өңірінде вокзалдар жаңарып жатыр. Өткен жылы Құлсары станциясында жаңа теміржол вокзалы бой көтеріп, халыққа қызмет етуге берілді. Жаңа ғимарат заманауи құрылғылармен жабдықталған.
Ганюшкино вокзалының жолаушылар перроны жаңартылып, жаңа үлгідегі төсеніштер төселді. Ол жолаушының жүріп-тұруына немесе еркін қозғалысына кедергі келтірмейді. Сондай-ақ, аймақтағы барлық вокзал перрондары жаңа үлгідегі жарық шамдарымен жарақтандырылды. Түнгі мезгілдегі жолаушылардың қауіпсіздігіне және теміржол қызметкерлерінің жұмыс атқаруына қолайлы жағдай туғызылды.
Мақат және Доссор вокзалдарының жылу беру нүктелері табиғи газбен жылыту жүйесіне көшіріліп, жаңа жылу қазандықтарымен қамтамасыз етілді. Сағыз вокзалының шатыры жаңартылып, бұрын істен шыққан әжетханалары қайта жасақталып, пайдалануға берілді.
Аймақта эпидемиологиялық ахуалға байланысты СОVID-19 індетіне қарсы теміржолшылар қорғаныс құралдарымен (бетперде, антисептик) толықтай қамтамасыз етілген. Жалпы, бөлімшеде қызмет жасайтын 1998 адамның ішінен 1856 адам вакцинациядан өтті, бұл 96 пайызды құрайды.