Ақтөбе станциясы күніне шамамен 27 жұп жүк пойызын қабылдап-жөнелтеді
Ақтөбе облысы бойынша меншікті тілші
Бірінші класты Ақтөбе станциясы екі бағытта жұмыс істейді: Илецк және Қандыағаш бағыты. Өткен жылдың өндірістік көрсеткіштерін жоғары деңгейде жапқан станцияның биылғы қарқыны да жаман емес.
Барлық ірі қалалардағыдай Ақтөбе-1 және Ақтөбе-2 станциялары бар, олардың атқаратын жұмыс ерекшеліктері де бөлек. Мәселен, Ақтөбе-1 станциясында жолаушылар және жүк пойыздарын қабылдау және жөнелту, жергілікті және құрама пойыздарды өңдеу, жолаушылар пойыздарын жасақтау мен жабдықтау, тіркеме вагондарды жолаушылар пойыздарынан ағыту, пойыздарды техникалық байқаудан өткізу, кірме жолдардағы жүк операцияларын жүргізу, жүк операциялары аяқталғаннан кейін вагондарды тазалау, транзиттік пойыздардан локомотивтерді ажырату, маневрлік локомотивтермен жұмыс, локомотив бригадаларын ауыстыру, т.т. міндеттері кіреді.
Ал Ақтөбе-2 станциясында демонтажға келген пойыздарды тарату, жергілікті және құрама пойыздарды өңдеу, пойыздарды қалыптастыру, пойыздарды техникалық және коммерциялық тексеру секілді жұмыстар атқарылады.
Пандемия жағдайы жүк тасымалына әсер етпей қойған жоқ. Жүк түсіру, тиеу жұмыстарына шектеу шаралары станция жұмысына, жоспардың орындалуына белгілі бір деңгейде әсер етті. Әрине, коронавирустық індеттің салдарына қарамастан станция жұмысы тоқтаған жоқ. Теміржолшылар қауіпсіздік шараларын сақтап еңбек етті және жүз пайызға жуық вакцина алғанның арқасында теміржолшылар арасында өлім-жітім болмады. Ал бүгінгі таңда қауіпсіздіктің жасыл деңгейіне өткен Ақтөбеде теміржолшылар тірлігі жандана түскен.