Семей ТЖ қауіпсіздікке қатысты 61 әкімшілік құқықбұзушылық анықталды
Абай облысы бойынша меншікті тілші
Семей ЖТ бөлімшесі бойынша өзекті мәселелердің бірі желі бойындағы жаяу жүргіншілердің қауіпсіздігі болып тұр. Осы орайда Семей станциясындағы желілік полиция бөлімінің қызметкерлері балалар мен жасөспірімдердің теміржол бойындағы қауіпсіздігін сақтау мақсатында «Тоқтаңыз, басып кету қаупі бар!» атты акцияның бірінші кезеңін өткізді, деп хабарлайды Rail-news.kz.
Шара барысында тәртіп сақшылары теміржолшылармен бірлесіп арнайы жұмыс штабын құрған болатын. Оған қоғамдық қауіпсіздік және басқа да қызметтер бойынша 18 қызметкер жұмылдырылды.
Акцияның негізгі мақсаты – пойыздардың адамдарды басып кету фактілерінің алдын алу, сондай-ақ балаларды теміржол бойындағы қауіпсіз жүріс-тұрыс ережелеріне дағдыландыру.
Іс-шара кезеңінде желі бойына жақын орналасқан елді мекендердегі тұрғындармен үш мәрте кездесу, әңгімелесулер, теміржол вокзалының қызметкерлерімен екі рет құқықтық түсіндіру шаралары өткізілді. Оның сыртында теміржолға жақын орналасқан оқу орындарында да қауіпсіздік тақырыбында арнайы сабақтар өтті. Сонымен қатар, түсіндіру-кеңестік көмек көрсету мақсатында жолаушылар пойыздарында да жиындар өтіп, жолаушылармен кездесулер ұйымдастырылды. Арнайы буклеттер мен ескертпелер үлестірілді.
Бір бұл емес, акция аясында тәртіп сақшылары ӘТЖК Семей филиалы қызметкерлерімен қала ішіндегі желі бойында бірлесіп рейдтер де өткізді. Теміржолдың рұқсат етілмеген жерінен кесіп өткен балалармен олардың ата-аналарының қатысуымен әңгімелесулер де өтті.