Семейде көктемгі су тасқынының алдын алу шаралары қызу жүріп жатыр
Абай облысы бойынша меншікті тілші
Биыл кешігіп келген көктем шығысқа да жетті. Наурыз айы туысымен теміржолшылар үшін су тасқынымен күрес шаралары қарқын алды. Семейліктер үшін бұл ретте қыс бойғы жүргізілген жұмыстар оң нәтиже беруде.
Негізінен Семей магистральдық желі бөлімшесінің аумағы – республика бойынша жауын-шашын мол түсетін әрі өзен-көлшігі және бұлақ сулары көп аймақ. Сондықтан, теміржолшылар үшін жылдың осы мезгілі аса мазасыз өтеді. Оның үстіне теміржол желісі көктей өтетін Абай облысының 8 аумағы еріген қар мен қызылсу басу қаупі аса жоғары аймақ саналады.
Қазіргі таңда Семей магистральдық желі бөлімшесінің басшысы Айдын Шәукежановтың жетекшілігімен құрылған арнайы топ су тасқынының алдын алу бағытында жұмыстар жүргізіп жатыр. Осыған дейін арнайы жоспар әзірленіп, атқарылар іс-шаралар пысықталған болатын. Оның ішінде еріген қар сулары суағарлар арқылы кәріздерге жіберіліп, желі бойына жақын орналасқан көлдер мен өзендер және су қоймаларының деңгейі тәулік бойы бақылауға алынған.
Бөлімше мамандарының сөзіне сүйенсек, наурыздың 25-і күнгі көрсеткіш бойынша НЖС-6 мекемелеріне тиесілі 440 көпір, 368 құбыр, 181 км арық, 1216 км су жүретін арналар қардан толық аршылып, тазаланған. Сонымен қатар, көктемгі сең жүру және қызылсу тасқынының алдын алып, қажет жағдайда шұғыл жұмылдыру мақсатында қажетті техникалар қазіргі күні толығымен даяр тұр.
Мамандардың айтуынша, Семей ЖТ бөлімшесі бойынша су шаю қаупі ең жоғары аумақтар Жаңа-Семей және Аягөз жол дистанциясының қарамағындағы телімдер екен. Сондықтан, екі жол дистанциясы – ПЧ-40 пен ПЧ-42 жолшыларына елеулі күш түсіп тұр.
Ал, бөлімше қарамағындағы желі бойында жалпы саны 89 қауіпті орын бар. Жекелей тоқталсақ, ПЧ -39-да – 6, ПЧ-40-та – 13, ал Аягөз жол дистанциясы бойынша 20 орын тасқын болуы мүмкін қатерлі аумақтар тізімінде. Сонымен қатар, шығыстағы Защита-Күмістау-Алтай телімдерінде қар көшкіні жүру қаупі әлі де жоғары күйінде қалып отыр. Оның үстіне соңғы тәуліктердегі толассыз қар мен жаңбыр да қырағылықты арттыруды міндеттеп отырған жайы бар. Сондықтан, босаңсуға жол жоқ.