Сағыз станциясында вокзал салу мәселесі сағызша созылып барады
Атырау облысы бойынша меншікті тілші
Қызылқоға ауданындағы Сағыз станциясы Мақаттан – 140 км, Атырау қаласынан 300 шақырым қашықта орналасқан. Осыдан тұп-тура 70 жыл бұрын салынған вокзал жаңартуды қажет етеді, әбден тозығы жеткен.
Атырау-Қандыағаш темір жолының құрылысы 1936 жылы басталып, оның Атырау-Сағыз бөлігі 1942 жылы толықтай және тұрақты пайдалануға берілгені белгілі. Жергілікті тұрғындардың айтуынша, Сағыз теміржол вокзалы 1952 жылы бой көтерген. Жетпіс жылдан бері тек сылау-сырлаумен келе жатқан ғимарат бүгінде тозығы жеткені өз алдына, іші айналымға келмейтін тар, қыста жылуы нашар, асхана, дәретхана және жүк сақтау бөлімі деген атымен жоқ. Ал адам саны жетпіс жылдан бері бірнеше есеге өсті. Сондықтан жаңа ғимарат қажеттігі талас тудырмайды. Бүгінде вокзал «Қазақстан темір жолы» ҰК» АҚ иелігінде, алайда, жергілікті әкімдік өз балансына алуды көздеп жүрген жайы бар.
Біздің білуімізше, өткен жылы Атырау магистральдық желі бөлімшесі Сағыз темір жол вокзалы ғимараты, оның құрылыс ауданы мен жолаушыларға қызмет көрсету сапасын техникалық тексеруден өткізіп, нәтижесінде жаңа вокзал тұрғызу үшін жобалық-сметалық құжаттарын жасақтауға жіберілді делінген. Алайда, вокзал салуды жергілікті әкімдік қолға алатын болған соң ол жұмыс тоқтап қалған сияқты. Жергілікті халық вокзалды кім салса да, тезірек қолға алса дейді. Сағыз – аудандағы халқы ең көп шоғырланған елді мекен. Станция арқылы 30 жұп жүк пойызы, 8 жұп жолаушылар пойызы өтеді. Сондықтан жаңа вокзал Сағызға керек-ақ.