Су басу қаупінің бетін қайтару үшін ақтөбелік жолшылар 3 тәулік күні-түні жұмыс істеді
Ақтөбе облысы бойынша меншікті тілші
Еліміздің батыс аймағында күннің тез жылып кетуінен республикалық маңызы бар автожолдар тасыған су астында қалды. Еріген қар суы теміржолға да қауіп төндірді.
Сәуірдің алғашқы күндері Ақтөбе темір жолының ең қауіпті нүктесі Қандыағаш-Қарауылкелді учаскесінде теміржолды су басу қаупі орын алды. Теміржолшылар үш тәулік бойы ұйқы көрмей жұмыс істеп, су айдайтын насоспен су сору жұмыстарын жүргізді.
«Теміржол мен инженерлік нысандардың жай-күйі тұрақты режимде бақыланды. Егер қауіп-қатер анықталса, локомотив бригадалары осы учаскедегі пойыз диспетчерлері мен станция қызметшілерін, сондай-ақ келе жатқан және келесі пойыздардың жүргізушілерін дереу хабардар етеді», – деді Ақтөбе магистральдық желі бөлімшесіне қарасты мемлекеттік емес өртке қарсы қызметінің бастығы Әділ Құбаев.
Қауіптің беті қайтқан соң үш тәулік бойы орын алуы ықтимал су тасқынымен күресіп, теміржол бойын күзеткен Шұбарқұдық және Қандыағаш өрт сөндіру пойызының жұмысшыларын ақтөбелік әріптестері ауыстырды.