Сәуірдің 4-і күнгі мәліметтер бойынша Семей ЖТ бөлімшесінің аумағында теміржол төсемдерін су шаю фактілері тіркелген жоқ, деп хабарлайды Rail-news.kz.
Қазіргі уақытта өңірдегі қар аса жылдам қарқынмен еріп жатыр. Әуеден бақылау жүргізген төтенше жағдайлар басқармасынан алынған мәліметтер бойынша облыстың қар басқан аумағы 73%-дан 66%-ға дейін азайған. Сонымен қатар, теміржол көпірі бар бірқатар шағын өзендердегі мұздың еруі байқалады. Әсіресе, Локоть-Семей және Шемонайха-Өскемен-1 станциялары аралығындағы өзендер мен су қоймаларындағы гидрологиялық ахуал біршама алаңдатып тұр.
Дегенмен, теміржолшылар тәуліктік кезекшілік орнатқан. Желі бойына бақылау жүргізу локомотив бригадаларына да тапсырылған. Жол диспетчерлері де қырағылық танытуда. НЖС-6 басшысы Айдын Шәукежановтың төрағалығымен құрылған арнайы штаб қарқынды жұмыс жүргізуде, әрбір станциядағы ауа температурасы мен желдің жылдамдығы, тіпті телімдер бойындағы өзен-көлдердегі су деңгейі де сағат сайын жаңарып тұр. Егер тосын жайт туындар болса, теміржолшылар басшылық келісімімен бірден стандартты емес жағдайда жұмыс істеуге даяр.
