Қызылтам бекетінде екі бағыттамалы бұрма жинағы жаңартылды
Қызылорда облысы бойынша меншікті тілші
Көктем мен жаз – жол шаруашылығы үшін жол жөндеу жұмыстарын жүргізуге ең қолайлы кез. Сондықтан жол саласын сауықтыру жұмыстары негізінен жаз маусымына жоспарланады. Кеше Қазалы жол дистанциясының теміржолшылары Қызылтам бекетінде екі бағыттамалы бұрма жинағын ауыстырды.
Қызылорда магистральдық желі бөлімшесіне қарасты Қазалы жолшыларына бағыттамалық бұрмалар жинағын ауыстыру үшін 6 сағаттық толаскез берілді. Жолшылар осы уақытты тиімді пайдаланып, жоспарлы жұмыстарды технологиялық талап деңгейінде атқарып шықты. Бекет жолдарындағы 6 және 8-ші бағыттамалық бұрма жинақтарын кешенді ауыстыру жұмысына алдын ала дайындық жасаған дистанциялықтар жаңа жинақтарды технологиялық стандарттар негізінде орналастырды. Жұмысқа телім бастығы Шынберген Ерханов пен орынбасары Ғалымжан Қарымсақов, жол шебері Ерболат Боданов басшылық жасады.
Бұған дейін қолданыста болған P-65 типті бағыттамалы бұрмалар ағаш шпалда орналастырылғандықтан олардың жарамдылық уақыты таусылған. Енді дәл осы P-65 бұрмасы темірбетон шпалға орналастырылып, ауыстырылып жатыр. Сәйкесінше жарамдылық мерзімі де ұзақ, төзімділігі де жоғары.
Қазалы жолшылары екі бағыттамалы бұрманы кешенді ауыстыру жұмыстарында жол шаруашылығына тиесілі жұмыстарды түгел атқарып шықты. Ал қазалылық ШЧ, ЭЧ дистанциялары мен станция теміржолшылары да белгі беру-байланыс, электрмен жабдықтау сынды өздеріне тиесілі жұмыстарды жауапкершілігіне алды. Телімнен кесте бойынша өтуі тиіс жылжымалы құрамдардың кідірісіне жол берілген жоқ.