Қызылорда станциясында еңбек озаттарымен кездесу өтті
Қызылорда облысы бойынша меншікті тілші
Қазалы вагон пайдалану депосының Қызылорда станциясындағы қосынында ерекше кездесу өтті. Шараға екі рет «Қозғалыс қауіпсіздігі үшін» төсбелгісінің иегері атанған Сейтмек Онбаев пен депода қырық жылға жуық жұмыс жасап келе жатқан ерлі-зайыптылар – аға вагон қараушы Маратбек пен оператор Шәкмарал Тұралиевтар қатысты.
Кездесуді «Аманат» партиясының теміржол бөлімшесіндегі филиалының атқарушы хатшысы Базара Танбаева ұйымдастырды. Жаңа Қазақстанды құрудағы саяси реформалар жайында әңгіме өрбіткен партия белсендісі саясаттан тыс қарапайым еңбек адамдарының үлесі табанды да адал еңбек деген тұжырым жасады.
– Біз өзімізге идеалдарды алыстан іздейміз, ал жанымызда жүрген, шын мәнінде, үлгі тұтар үздіктерімізді ескере бермейміз. Бүгін осы олқылықтың орнын толтырып, кәсіби жұмысында жетістікке жеткен еңбек адамдарын насихаттап, жас буынға олардың тәжірибесі мен шеберлігін үлгі етсек дейміз, – деді Б.Танбаева.
Еліміздің өркендеуіне қарапайым еңбек адамының қосар үлесі туралы сөз қозғағанда вагонның доңғалақ буксының күрделі ақауын, бүйірлік рамадағы жарықты тауып, екі рет «Қозғалыс қауіпсіздігі үшін» төсбелгісін алған вагон қараушы Сейтмек Онбаевтай теміржолшылар алдымен ауызға алынуы заңдылық. Ал 350 жылдық тарихы бар Тұралиевтер әулетінің еңбек жолын жалғастырып келе жатқан ерлі-зайыпты теміржолшылар ұрпақтар сабақтастығының жарқын үлгісі емей, не?!
Кездесуде басқосу кейіпкерлерінің әсерлі әңгімесі тыңдалып, теміржолшы кәсібінің ыстық-суығымен қатар абыройы сөз болды. Депоның арғы-бергі тарихынан естеліктер айтылды.