Семей ЖТ бөлімшесінде көктемгі комиссиялық тексеру басталды

Ел шығысындағы Семей ЖТ бөлімшесі бойынша жыл сайын өткізілетін көктемгі комиссиялық тексеру жұмыстары басталды. Сәуір айының 25-нен басталған шара мамырдағы мерекелік күндерге дейін жалғасатын болады.

– Биылғы көктемгі байқау жылдағыдан кештеу басталды. Оған себеп шалғайдағы станциялар мен мекеме теміржолшылары комиссиялық тексеру шараларына толық даярлық жүргізіп алсын дедік. Оның үстіне Өскемен өңірінде, Защита-Күмістау-Алтай телімі бойынша қалың қар қауіп туғызып, кеш еріді. Жол шаруашылығындағы барлық құрылғыларды сүзгіден толық өткізіп шығу үшін қосымша уақыт қажет болды, – дейді бұл орайда пікір білдірген Семей ЖТ өндірістік техникалық бөлімінің қызметкерлері.

Көктемгі комиссиялық тексеру биыл Ақтоғай-Аягөз телімінен басталды. Жаңадан тағайындалған бөлімше басшысы Владимир Бабиченко тексеру барысында бастан-аяқ жүріп, барлық станциялар мен жол айрықтарында болып, бөлімше жұмысымен толық таныспақ. Сонымен қатар, Аягөз, Шар, Дегелең сынды жүк станцияларында тораптық кеңестер өткізіліп, бірқатар мәселелер сарапқа салынбақ. Қозғалыс қауіпсіздігі департаментінің Семей аймағы бойынша бас ревизоры Темірбек Ақшалов арнайы баяндама жасап, сала қызметкерлерінің олқы тұстарын сарапқа салады деп күтілуде. Онда қысқы жұмыстардың қорытындысы жасалып, әр мекеменің қызметі бағаланып, жазғы маусымдағы межелі шаралар талқыланатын болады.

Бақылау жұмыстары осыдан соң Шар-Жаңа-Семей, Локоть-Семей телімдері бойынша жалғаспақ. Одан кейін Дегелең мен Жаңа-Семей аралығындағы жазғы жұмыстарға әзірлік барысы толықтай тексерілетін болады. Ал, Ауыл, Белағаш, Дүйсекен, №41 жол айрығы телімдерін сүзгіден өткізу алдағы аптаға жоспарланған. Ал Семей мен Жаңа-Семей станциялары бойынша тексеру ең соңынан жүргізілмек.

Көктемгі комиссиялық тексеру жұмыстарының нәтижесі 13 мамыр күні Семейдегі кеңейтілген тораптық жиында жарияланады.