Жамбылдықтар өндірістік жарақатқа ұшыраған 15 жұмысшыға көмек көрсетті
Жамбыл магистральдық желі бөлімшесінде 20-27 сәуір аралығында 28 сәуір – Дүниежүзілік еңбек қорғау күніне арналған апталық өтуде. Осыған орай бөлімшеге қарасты кәсіпорындардың еңбек қорғау инженерлерінің қатысуымен семинар-кеңес өтті, деп хабарлайды Rail-news.kz.
«2022 жылы еңбекті қорғау мәдениетін қалыптастыру» тақырыбына өткен жиында Магистральдық желі бөлімшесінің бас инженері Нұрлан Баялиев баяндама жасады. Көпшілік алдымен өндірісте мерт болған әріптестерін бір минут үнсіздікпен еске алды. Бас инженер Нұрлан Арғынбайұлы соңғы бес жылда, 2016-2021 жылдар аралығында өндірістік жарақат алған теміржолшылар әрекетіндегі қателіктер мен жұмыс орындарын ұйымдастырудағы кемшіліктерге жан-жақты тоқталды. Магистральді желі бөлімшесіне қарасты мекемелерде өткен бес жылда 10 оқиға орын алыпты. Оның бесеуі жол шаруашылығында, екеуі байланыс, ал үшеуі электрмен жабдықтау дистанцияларында болған.
- Сараптама көрсеткендей, өндірістік жарақат алғандардың жас шамасы 40 жастан жоғары және дені – бес-алты жыл ғана тәжірибесі бар мамандар. Яғни, мамандардың біліктілігі төмен немесе жұмыс орнын ұйымдастырудағы кемшіліктер себеп болған деп қорытынды жасауға болады. Біріншіден, жарақат алушының қауіп-қатерге мән бермеген бейқамдығы, екіншіден жұмыскердің өз еркімен жұмыс орнын кеңейтуі немесе жұмыс орнын дұрыс ұйымдастырмауы қателіктерге ұрындырған, - дейді Нұрлан Арғынбайұлы.
Ағымдағы жылы бекітілген кестеге сәйкес ақпан айында Түлкібас және Шу жол дистанциялары мен Шу электрмен жабдықтау дистанциясында, наурыз айында Сары-Шаған жол дистанциясында, Шоқпар электрмен жабдықтау дистанциясында және Сары-Шаған байланыс және сигнал беру дистанциясында тексерістер жүргізілген. Нәтижесінде 54 ескерту берілсе, оның ішінде 38-і еңбекті қорғау бойынша, 13-і өндірістік қауіпсіздік, 3-уі электрмен жабдықтау қауіпсіздігі бойынша анықталыпты. Бүгінгі күні бұл ескертулер толықтай жойылған.
Бүкіләлемдік Еңбекті қорғау күніне орай ұйымдастырылған апталық барысында барлық мекемелерде ұрансөздер ілініп, өндірісте мерт болған азаматтарды еске алу шаралары өтуде. Сондай-ақ, бөлімше бойынша өндірістік жарақат алған 15 азаматқа кәсіподақ ұйымының қызметкерлері мен мекеме басшылары арнайы барып, әлеуметтік көмектер көрсетті. Әлеуметтік себет таратылып, қаржылай қолдау жасалып, еріктілердің көмегімен ол азаматардың бау-бақшасын көктемгі мезгілге дайындап, аулаларында сенбіліктер ұйымдастырылуда.