Семей ЖТ Еңбекшілерді қорғау күніне арналған байқауға 6 команда қатысты
Абай облысы бойынша меншікті тілші
Семей ЖТ бөлімшесінің теміржолшылары Дүниежүзілік еңбек қорғау күнін ұжым болып атап өтті. Бұл күні жергілікті сала қызметкерлері түрлі танымдық ойындар, байқаулар өткізіп, өндірістік қауіпсіздік, ақаусыз қызмет және жұмыс орындарындағы сақтық шараларын тағы бір мәрте пысықтады, деп хабарлайды Rail-news.kz.
Бұл орайда бөлімшенің кәсіподақ ұйымының белсенділері ұйымдастырған шараның тағылымдық мәні зор болды. Семей магистральдық желі бөлімшесінің теміржолшылары вокзал алаңында танымдық ойындар өткізіп, өндірістік жарақаттанудың алдын алу бойынша әзірленген викториналық сұрақтарға жауап берді. Байқауға 6 команда қатысты. Еңбек қорғау жайлы қызықты сұрақтарға дұрыс жауап берген командалар анықталып, кәсіподақ ұйымы тарапынан ақшалай сыйлыққа ие болды.
Жұмыс орындарында қаза болған еңбеккерлерді бір минуттық үнсіздікпен еске алу рәсімінен соң бас инженер Айдос Жаманбаев өндірістік қауіпсіздікті сақтаудың маңызы жай- лы баяндама жасады. Мұнымен қоса, Айдос Кемелханұлы еңбекті қорғау бойынша үздік нәтижелерге жеткен теміржолшыларға мақтау қағаздарын табыс етті. Бұл орайда 27 жыл бойы еңбек қорғау саласында қызмет етіп, бірде-бір рет өндірістік жарақаттануға жол бермеген еңбек қорғау бөлімінің жетекші инженері Гүлзавира Елемесова әріптестерінің құрметіне бөленді. Ал 15 жыл бойы мекемеде қауіпсіз еңбек жағдайын қамтамасыз етіп, қауіпсіздік талаптарын қатаң сақтап, еңбекті қорғау мәдениетін жоғары ұстанып, өндірістік жарақатқа жол бермегені үшін Семей, Шар және Жаңғызтөбе, Суықбұлақ пен Жарма станциялары, Семей вагон пайдалану депосының ұжымдары бөлімше басшысы Владимир Бабиченконың алғыс хатына ие болды.
Семей ЖТ бөлімшесінің теміржолшылары биылғы жылдың алғашқы тоқсанын ақаусыз өткізді. Өткен жылы да өндіріс бойынша ешқандай жарақаттану фактілері орын алмаған болатын.
