Референдум мәселесі Сыр теміржолшылары арасында да талқыланды

Бүгінде қоғамдағы басты әңгіме – 5 маусымда өтетін жалпыхалықтық референдум. Соған орай республикалық штаб өкілдерінен жасақталған арнайы топ Қызылорда теміржолшыларымен кездесіп, ел тарихындағы айтулы оқиғаға қатысты түсінік берді.

Олар алдағы референдумның маңыздылығы, Ата Заңға енгізілетін толықтырулар мен өзгерістер, жаңадан енгізілген баптарға жеке-жеке тоқталып, түсініктеме беріп, көпшіліктің сауалдарына да жауап беріп, ұсыныстарын тыңдады.  

– Ата Заңға өзгерту енгізу – қазіргі уақыт талабы. Қоғамда оның не қажеті бар деген де сөздер айтылып жатыр. Өзгеріс енгізу арқылы ғана біз жаңа қоғам қалыптастырамыз. Тек қана мемлекет шешеді, тек қана мемлекет біледі деген түсінікті жою керек . Бұл референдум әр азаматтың елі үшін маңызды тарихи оқиғаға атсалысуына мүмкіндік береді. Қазақстанның әрбір азаматы өзін сол елдің құрушысы, негізін белгілеуші ретінде сезінгенде ғана мемлекетті басқарудың жаңа үлгісі пайда болады, – деді «Аманат» партиясы «Теміржол» филиалының атқарушы хатшысы, республикалық штаб мүшесі Базара Танбаева. 

Теміржолшылардың көпшілігі, әрине, халық көптен күткен өзгерістердің бастамасы болатын референдумның өткізілуін қолдайтындарын білдірді. Елімізде өндіріс орындары көптеп ашылып, жұмыссыздық жойылып, халықтың әлеуметтік, экономикалық әлеуетінің жақ- сарғанын қалайды. 

– Теміржолшылар – көзі ашық, сауатты халық. Алдағы уақытта бұған дейін сайланбалы басқару жүйесі, ендігі жерде халық таңдаған басқару жүйесіне ауысады деп үміт күтеді және ертеңгі күнге деген сеніммен референдум өткізу шарттарына келіседі және бір кісідей қатысады. Ең маңыздысы ендігі жерде халықтың өзі таңдаған басқару жүйесінің тиімді әсері сезілетін болады, – дейді «Қазкөліккәсіп» ҚБ филиалының төрағасы Бауыржан Ахметов.