Қызылордада пойыз жолына бөгет болу мәселесі өзекті
Қызылорда облысы бойынша меншікті тілші
Жуырда Қызылорда жол дистанциясында «Жолға бөгде зат қою – қылмыс» атты айлық өтті. Жосалы мен Түркістан станциясы аралығындағы 400 шақырымға жуық темір жолдың қауіпсіздігін қамтамасыз етіп отырған дистанция жолшылары қозғалысқа кедергі келтіретін кез келген келеңсіз жайтпен күресіп келеді.
Жол дистанциясының техникалық бөлім басшысы Кенже Қойшыбаева айлық кезіндегі атқарылған шаралар жайлы әңгімелеп берді. Маманның мәліметіне сүйенсек, жолшылар қауымын алаңдататын нәрсе жоқ емес.
– Жыл басынан бергі 3 ай 20 күн ішінде қаскүнемдер 2 рет жолға бөгде зат қойып кетіп, пойыздар жүрісіне үлкен қауіп төндірді. Жолшылардың дер кезінде байқап, тепловоз машинистерінің жедел тежегіш қолдануының арқасында келеңсіз жағдайға жол берілмеді. Жалпы қозғалысқа кедергі келтіретіндер аз емес, осы аралықта машинистердің жедел тежегіш қолдану фактілері 22 рет тіркелді. Рельс үстіне бөгде зат қойып, пойыз қалай өтер екен, құлай ма, тоқтай ма деп еріккеннің ермегін істейтін санасыздардан бөлек, жер құрып қалғандай, рельс үстімен жүріп келе жатып арттан келіп қалған пойызды байқамай өз өмірін өзі қатерге тігіп ажал құшатындар, иесіз жайылған төрт түліктің кесірі. Одан қала берді, егістіктегі қураған шөпті өртейтін шаруалар салғырттығы нәтижесінде оттың теміржолды зақымдауы, теміржолдың бөлшектерін ұрлап, қолды қылатындар әрекеті бар, қысқасы, қайсысы болса да қауіпсіздікке жасалған қиянат болғандықтан үлкен-кішісі жоқ, бәрі де қылмыс. Осындай келеңсіз жайттардың алдын алу үшін жергілікті атқарушы билік органдарына қанша қатынас хат жазылды. Орган өкілдерімен бірге тұрғындармен сан мәрте кездесу өткізіліп, теміржол бойында қауіпсіздік шараларын қатаң сақтау ереже- лері талай ескертіліп, түсіндіру жұмыстары тұрақты жүргізіліп келеді. Алайда, оның нәтижесі мардымсыз болып тұр, – дейді Кенже Әмірбекқызы.