Маңғыстаудағы тепловоздардың дені жазғы тасымалға дайын

Маңғыстау локомотив пайдалану депосында тепловоздар көктемгі комиссиялық байқаудан өтіп, жазғы маусымға дайын деуге болады. Бүгінгі таңда соңғы бірнеше тепловоздың дайындығы жасалуда.

  Десе де қолбайлау болып тұрған бір мәселе бар. Ол қазіргі көрші елдерде болып жатқан сыртқы саяси жағдайларға байланысты. Атап айтсақ, Ресейден келетін бояулар уақытылы жетпей жатыр екен. Сондықтан тепловоздарды сырлау жайы кейінге шегерілуде. Депо мамандарының айтуынша, бұл көпке ұзай қоймас, мамыр айының соңына дейін шешімін табуы тиіс. Комиссиялық байқау біткенмен тепловоздарды сырлау сосын да жалғаса береді дейді олар. Жоспар бойынша 42 тепловоз толық сырланады, 6 тепловоз бұрқасын бояумен боялады екен. Жалпы бүгінде Маңғыстау локомотив пайдалану депосының паркінде 61 тепловоз бар. 10 тепловоз күрделі жөндеу жұмыстары жүргізілуіне байланысты көктемгі комиссиялық байқауға жатпайды. 

Көктемгі комиссиялық байқауға алынатыны тек 48 тепловоз. 2ТЭМ10МК және ТЭ33А темір тұлпарлары Мақат, Шалқар, Сексеуіл деполарында, ал ТЭМ2 тепловоздары Маңғыстау станциясындағы «Ғасыр Маңғыстау» ЖШС жөндеу депосынан байқаудан өтеді.  

– Осыған дейін «Ғасыр Маңғыстаудан» ТЭМ2 сериясынан 11 тепловоздың барлығы да тиісті дайындығын алды. Мұнда ТО-3, ТО-6 жөндеулері жасалды. Аталған тепловоздың техникалық жағдайы қанағаттанарлық, жақсы деуге болады. Ал Мақат, Шалқар, Сексеуіл деполарында байқаудан өтетін тепловоздар әлі де бар. Бәрі де өз уақытымен жүргізіліп, мамырдың соңына дейін толық дайын болады деп отырмыз, – дейді Маңғыстау локомотив пайдалану депосы жөндеуді бақылау бөлімінің бастығы Сәбит Зияев.

  Бояу екеш бояуды да Ресейден алып отырғанымыз – осы күнге дейін шешілмей отырған тағы бір мәселенің ұшығы. Осы арада, елімізде бояу мәселесі қашан шешіледі, локомотивтерге қажетті бояулар отандық өнімге қашан айналады деген сансыз сұрақтар туындайды...