Белкөл станциясында оқушыларға теміржол ережесі түсіндірілді
Қазақстан темір жолының өн бойында 16 мамырдан 16 маусымға дейін жарияланған «Темір жол – қауіпті аймақ» айлығы өтіп жатыр. Әсіресе жазғы демалысқа шыққан балалар теміржол маңын ойын алаңына айналдырмас үшін жер-жерде профилактикалық жұмыстар басталды.
Мектеп оқушыларымен, олардың ата-аналарымен кездескен теміржолшылар мен тәртіп сақшылары балаларды қауіп-қатерден сақтандырып, жол бойында тәртіп сақтауға шақыруда. Белкөл станциясында өткен кездесуде балаларға өткен-кеткен пойыздарға тас атып, рельс үстіне шеге, басқа да заттар қойып қызықтаудың соңы ауыр қылмыстық оқиғаға апарып соғатыны түрлі мысалдармен түсіндірілді. Бұдан бөлек, станция бастығының орынбасары Ербол Сембиев, ӘТЖК өкілі Жандос Тарманов, Қызылорда жол дистанциясының инженері Майра Бадрақова, станциядағы ЖІІб ӘПб инспекторы Берік Аққалиевтан құралған топ станция өткелдерінде рейд өткізді. Алайда рейд кезінде жолдан өту ережесін өрескел бұзғандар өз қателіктерін мойындап, «бәрін түсінген» болса да былай шыға бере сол өздерінің үйреншікті соқпағына түсіп, тағы да қиыс басып кете беретіні жасырын емес деп қынжылады теміржолшылар.