Ақтөбе теміржолында сақтақ шаралары күшейтілді
Ақтөбе облысы бойынша меншікті тілші
Теміржол бойы – қауіпті аймақ. Бірақ, жергілікті тұрғындардың жауапсыздығынан жазатайым жағдайлар көбейген. Жолаушыларды сақтыққа шақырған теміржолшылар дабыл қағып отыр.
Биыл үш айда ел аумағындағы теміржол бойында 158 рет мал басу оқиғасы болды. Адамдардың қатысуымен орын алған 18 жағдайдың екеуінде балалар зардап шеккен. Оның бірі Ағадыр станциясында болса, екіншісі Жіңішке станциясында тіркелді. Ақтөбе станциясының бастығы Нұрлан Ермағамбетов желілік полиция қызметкерлерімен бірлесе рейдтік іс-шара кезінде құлақтарын құлаққаппен бітеп алып, теміржол бойында қаннен қаперсіз кетіп бара жатқан талай жасөспірімді тоқтатып, олармен профилактикалық әңгімелесу өткізді.
«Жазғы каникулдың басталуымен мектеп жасындағы балалардың бос уақыты көбейеді. Жұмыстағы ата-аналар балаларын қараусыз қалдырады. Сақтықта қорлық жоқ, әсіресе теміржол сияқты қауіпті аймақта сақтық аса қажет. Міне, мынау құлаққап сияқты бір кішкентай нәрсенің өзі адам өлімінің себепшісі болатынына мән бермейміз. Өзім куә болған бір оқиғаны мен ылғи да қайталап айтудан жалықпаймын, біреу болмаса біреуге сабақ болар деймін. Көз алдымызда құлаққап киген ересек адамды жылжымалы құрам қағып кетті. Ол адам біздің айғайымызды да, тепловоздың даусын да естімей жол үстімен кетіп бара жатты. Соңынан жүгіріп жетеміз дегендер де үлгермеді. Қас қағым сәт...», – дейді Ермағамбетов. Ақтөбе станциясы қаланың қақ ортасында орналасқан.
Мәскеу ауданының тұрғындары теміржол өткелі арқылы вокзал аялдамасына келеді. Немесе, керісінше, вокзал жанындағы мектеп пен колледж оқушылары мен студенттері Мәскеу ауданындағы жатақханаға, үйлеріне барады. Көпшілігі аспалы көпірді пайдаланбайды. Жолды қысқартып, өткелдерді кесіп өтуге әуес. Тұрғындар жеке қауіпсіздіктің қарапайым ережелерін сақтауға құлықсыз. Сөйтіп, өз өмірлерін қатерге тігеді дейді теміржолшылар.