Әйтеке би ауданында электр мамандары тәжірибе алмасты

Ақтөбе магистральдық желі бөлімшесінің Ақтөбе электрмен жабдықтау дистанциясы қызмет көрсететін Әйтеке би ауданында көшпелі оқу-жаттығу, тәжірибе алмасу семинарын өткізді.

Ауданның оқу-жаттығу алаңында өткен семинарға дистанцияның барлық станциядағы өкілдері қатысты. Қауіпсіздік пен еңбекті қорғауды күшейтіп, қызметкерлердің біліктілік деңгейін арттыруға бағытталған шара кезінде жоғары желілік ток көздерімен жұмыс барысындағы қауіпсіздікті сақтау тәртібі көрсетілді. 

Атап өтерлігі, Ақтөбе ЭЧ мекемесі бекерден бекер таңдап алынбаған. Өйткені, дистанцияда бірнеше жылдан бері оқыс оқиға тіркелмеген. Өткен жылдың төрт тоқсанында да жақсы көрсеткішке шығып, Компания тарапынан қызметкерлер ақшалай қолдауға ие болды. Ұжымдағы жетістікке толы жұмыстар биыл да жалғасын тапты. 2022 жылдың бірінші тоқсанын да жақсы нәтижемен аяқтап, алтыншы орын мінберінен табылған ақтөбелік энергетиктер тағы да сыйақыға қол жеткізді. 

– 2022 жыл – еңбек қорғау және қауіпсіздік жылы деп жарияланды. Семинардың мақсаты – қызметкерлердің қауіпсіздігін сақтауға бағытталған жұмыстарды күшейту. Қазір жазғы жұмыстардың басталып жатқан кезі. Оқу-жаттығу шарасы, тәжірибе алмасу арқылы әр цехтың қауіпсіздік құралдарын қолдану дайындығы бақыланады. Қауіпсіздіктің сақталуы – біздің басты жетістігіміз, – деді Ақтөбе электрмен жабдықтау дистанциясының бастығы Сәкен Орынбаев. 

Семинар барысында Әйтеке би электрмен жабдықтау бөлімінің басшысы Нұрбол Жанділдаев рационализаторлық ұсыныс негізінде ойлап табылған трансформаторды көтеру-түсіру қондырғысының мүмкіндіктермен таныстырды. Салмағы жеңіл, қолдануы ұзақ уақытты алмайтын көтергішті Әйтеке би бөліміндегі электр механигі Айбек Бекжанов ойлап тапқан. Монтерлар осыған дейін трансформаторларды көтеруді бірнеше адам жасап, ұзақ уақыт алатын. Ал жаңа рационализаторлық жобамен трансформаторды түсіру жұмысын бір адам жасай алады. Салмағы жеңіл. Бағананың кез келген жеріне қолдану оңай. Бұл көмекші құралдың жасалу жолы, пайдалану тәсілі басқа цехтың қызметкерлеріне түсіндірілді. Және оның мүмкіндіктері жаттығу кезінде көрсетілді.

2004 жылдан бері жұмыс істеп тұрған Әйтеке би электрмен жабдықтау бөлімінде 16 адам еңбек етеді. Шағын цехтағы өнертапқыштың жетістігіне әріптестері оң баға берді. Оларға трансформаторды түсіру, қайта көтеру, ақауды қалпына келтіру жұмыстары және токқа түсіп қалған адамға 4 минуттың ішінде көмек көрсету шеберлігі көрсетілді. Бұл тәсілді барлық цех мамандары жасап шықты. 

– Дистанция бірнеше жыл жарақаттану оқиғаларына жол бермей жұмыс істеп келеді. Биылғы 5 ай қорытындысы бойынша да электрмен жабдықтау бөлімінде жазатайым оқиғалар орын алған жоқ. Жазатайым оқиғалар, әдетте қызметкерлердің тәжірибесіздігінен немесе керісінше тәжірибелі мамандардың өзіне тым сенімділігінен болады. Электр тогы қауіпті, себебі ол көрінбейді, иіссіз, түсі жоқ және біздің сезім мүшелерімізбен анықталмайды. Сол себепті еңбекті қорғау және қауіпсіздік ережелерін қатаң сақтау талап етіледі, – деді еңбекті қорғау жетекші инженері Руслан Жолдыбаев. 

Еңбек қорғау мен қауіпсіздік техникасының сақталуын қамтамасыз ету үшін Ақтөбе электрмен жабдықтау дистанциясына өткен жылы 14 дана экшн камера және 228 дана лото құлпы қолданысқа берілген. Ай сайын экшн камерадағы бейнежазбалар қаралып, талдау жасалынады. Еңбекті қорғау ережелерін бұзған қызметкерлерге тәртіптік жаза беріледі. Осылайша, еңбек қауіпсіздігінің сақталуына барынша көңіл бөлінетіні айтылды.