Сексеуілдіктер жүк тасымалы бойынша алдыңғы қатарда
Қызылорда облысы бойынша меншікті тілші
Сексеуіл станциясында бес айдың жұмысын қорытындылаған тораптық жиын өтті. Онда пойыздар қозғалысы қауіпсіздігін қамтамасыз ету мәселесіне қатысты жұмыстар ширатылды. Сондай-ақ бұған дейін жіберілген кемшіліктердің қайталанбауы үшін іс-шараларды күшейту жайы сөз болды.
– Биылғы қозғалыс қауіпсіздігіне байланысты аймақтағы ахуал өткен жылмен салыстырғанда төмен, кемшіліктер жоқ емес. Дегенмен жүк тасымалдау қорытындысы бойынша 14 бөлімше ішінде алғашқы үштік қатарындамыз. Әрине, бұл – ұйымшылдық танытқан ұжымның ортақ еңбегінің жемісі. Қазір бізді алаңдатып отырған негізгі мәселе – қозғалыс қауіпсіздігін сақтау. Осы бағытта жұмыстануымыз керек. Бүгінгі жиынға осы мәселеге жауапты теміржол саласының мамандарымен қатар көлік прокуратурасының өкілдері де қатысып отыр. Мақсат біреу, ол – қауіпсіздікті сақтауда туындап отырған қиыншылықтар мен кедергілерді бірлесіп шешу, оңтайлы жолын қарастыру, – деді «ҚТЖ-Жүк тасымалы» ЖШС «Батыс» филиалы Қызылорда қосалқы бөлімінің бастығы Батырхан Базарбаев.
Бұдан кейін сөз алған көлік прокуроры Еркебұлан Лесбеков, «Қазкөліккәсіп» филиалының төрағасы Бауыржан Ахметов, қауіпсіздік бөлімінің басшысы Бекжан Өтеулиев, Сексеуіл станциясының бастығы Сапарғали Салмаев, Сексеуіл локомотив пайдалану депосы бастығының орынбасары Еркебұлан Аяғанов өз салалары бойынша кемшіліктердің қайталанбауы үшін атқарылып жатқан жұмыс барысымен бөлісті. Өз кезегінде, көлік прокуроры жаңа телім бойындағы 9 станцияның маусым айынан бастап біріктірілген жүйемен жұмыс жасауға ауыстырылуына байланысты 20 шақты теміржолшының жұмыссыз қалуы және осы мәселенің оң шешілуін назарға алу керектігін өңір басшылығына ескертті. Ал ұжымдық шартқа қатысты түсініктеме берген «Қазкөліккәсіп» ҚБ Қызылорда филиалының төрағасы Бауыржан Ахметов, жаз маусымында теміржолшылар шипажайларға барып денсаулығын сауықтырып жүргенін, ал денсаулығына байланысты ем алуға ақшалай көмек айлық табысы 150 АЕК-тен аспайтын жұмысшыларға берілетінін және бұл жеңілдікке ие болғандар ақшалай жәрдемақыны қалаған шипажайда денсаулығын сауықтыруға жұмсай алатынын жеткізді.