Қызылордалықтар жыл басынан қауіпсіздіктің бұзылуына жол бермеді

Қызылорда станциясының теміржолшылары жыл басынан бері маневрлік және пойыздық жұмыстар барысында қозғалыс қауіпсіздігінің бұзылуына жол бермеді.

Айталық, 884 вагонға жүк тиеу жоспарын 1012 вагонды жүкпен толтырып, межені 114,47 пайызға асыра орындады. Ал тонналық салмағына қатысты бекітілген жоспардың орындалуы да 121,17 пайызды құрады. 

Станция бастығы Қайрат Төрединов, Қара-өзектегі станция жолдарына күрделі жөндеу өткізіліп жатқанына байланысты кесте бойынша жүріп жатқан пойыздардың кідірісін болдырмай, қозғалысты реттеуге Қызылорда бекетінің теміржолшылары атсалысып отырғанын атап өтті. Сыр өңірі бойынша жұмыс ауқымы жағынан басты бекет саналатын Қызылорда станциясының бүгінгі жұмысы күндегі тынысынан ерекшелеу. Жұмыстың ауқымдылығы мен жауапкершілігін сезінген станция бастығы диспетчерлік шеңбер жанында барлық әрекетті бақылауға алған. Әрине, қос станциядағы қозғалысты бір жерден басқару үшін біліктілік пен шеберлік, мол тәжірибе қажет. Бұл міндеттер бүгінгі ауысымда нағыз тәжірибелі теміржолшылар, станция кезекшісі Әли Бауыржанға, маневрлік жұмыстар диспетчері Исламбек Палмановқа және станция кезекшісі жанындағы оператор Күлайша Жүгінісоваға жүктелген. 

Қызылорда станциясы теміржолшыларының жұмыла еткен еңбегінің арқасында жоспар толығымен дерлік орындалды деуге болады. Мәселен, 5 ай ішінде металл тасымалына 28 вагонға сұраныс түскен, бірақ, іс жүзінде 103 вагонға дейін тапсырыс артқан. Сондай-ақ, сүрлем жем тасымалына 3 вагонға тапсырыс беріп, оның 9 вагонға өсуі, ал құрылыс заттары тасымалына бастапқыда тапсырыс болмағанымен, бір ай ішінде 75 вагонға құрылыс затының тиеліп жөнелтілуі де сандық көрсеткіштің өсіміне оң әсер еткен. Ал, транзиттік вагондардың құжаттарын рәсімдеу көрсеткішінің 91,70 пайызды құрауы вагон иелерінің қандай да бір себептерге байланысты вагондардан бас тартып, «тастанды» вагондардың станциялық жолдарда иесіз қалып қоюынан туындаса керек.