Маңғыстау жол дистанциянда ұрлық-қарлық тоқтамай тұр

Теміржол мүлкіне көз салып, оңай олжа тапқысы келетіндер қатары азаймай тұр. Олар үшін теміржол бойындағы қауіпсіздіктің құны көк тиын. Атап айтқанда, Маңғыстау жол дистанциясының аумағында жыл басынан бергі бес айда 5 ұрлық тіркелген.

– Тұрғындар арасында түсінік жұмыстарын жүргізіп, теміржолдан бір шеге алсаң да оның соңы қауіп-қатерге соқтыратынын айтудан кенде емеспіз. Соған қарамай жылдан жылға ұрлық азаймай, қайта көбейіп барады. Былтыр бұл уақытта бір ұрлық тіркелген еді. Резервте тұрған Р65 типті 25 метрлік рельс ұрланды. Оның қаржылай шығыны 53 мыңнан асады. Қазір дерек те, келтірілген залал да көбейіп кетті. Ақпан айының 21-де 21   дана төсем, 253 дана балдақ қолды болды. Осындай жағдайлар ақпан айының соңында, наурыз күндері тағы қайталанды. Енді бірде вагонның кетіп қалуына қарсы құрылғы ұрланды. Бірақ, «противагонды» алып, арам ойын іске асырмақ болғандар ұсталып, мүлік кері қайтарылды. Сәуір айында малға қарсы қоршаудың 200 метр тросы, тағысын тағы темір жол бөлшектері із-түзсіз жоғалып кетті. Іздестіріп жатырмыз, – дейді Маңғыстау жол дистанциясының жетекші инженері Мұхтар Күлшінбаев.

Ол бұл ұрлық-қарлық Маңғыстау станциясы мен Р бекеті және Жетібай – Өзен станциялары, сондай-ақ, Р бекеті мен Боржақты аралықтарында кездескен. Одан келген шығын көлемі 127 мың 845 теңгеге жеткен.

– Ұрлықтың алдын алу бойынша ай сайын тұрғындармен кездесеміз. Биыл 17 рет кездесу өткіздік. Телім басшыларына теміржолдың жоғарғы қабат мүліктерін қараусыз қалдырмай, дүниелерін қоймаларда сақтау керектігін түсіндіреміз. Негізі далада бей-берекет жатқан мүлік жоқ, запас бөлшектің бәрі қоймада сақтаулы. Сонымен қатар әкімдіктерді де бұл іске тартып, олармен де бірлесе жұмыстар атқарылуда. Желілік полиция өкілдерімен бірге металл қабылдайтын орындарға рейд жасап, теміржол мүліктерін қабылдамау туралы хабарлап жатырмыз, – дейді дистанция маманы.