Атырауда 5 айда 17 малды пойыз басты
Атырау облысы бойынша меншікті тілші
Теміржолшылар үшін ең өзекті тақырыпқа айналған мал басу оқиғасы жазғытұрым көбеймесе, азаймаған. Себебі, жер аяғы кеңіген, жаз мезгілінде далада мал қараусыз өріп жүр. Сондықтан тепловоздардың шұғыл тежеуі де артып кеткен.
Атырау локомотив пайдаланым депосы бойынша биылғы жылдың 5 айында малдың жолға шығуының 101 оқиғасы тіркелген. Ал, жолға шыққан малды баспау үшін локомотивті шұғыл тежеу 107 рет тіркеліп, пойызға басылған мал басы 17-ге жеткен. Олардың бәрі сиыр, жылқы, түйе сынды ірі қара мал. Мамыр айының өзінде 30 шұғыл тежеу болып, 1 мал басылған. «Жол бойындағы мал нағыз «бас ауру» болып отыр. Шұғыл тежеудің өз зияны бар – тепловоз тұрып қалады, бүлінеді, уақыт кетеді, жанармай шығындалады, жолаушы пойызы болса жолаушыға қауіп төнеді, вагон аударылып жолдан шығып кетуі мүмкін. Қай күні апат болады деп отырмай, алдын алып, халық төрт түлігіне ие болатындай амал ойластыру қажет», – дейді депо инженері А.Қонарбаев.
Әсіресе қауіпті саналатын телімдер Атырау-Махамбет, Махамбет-Қызылжар, Бақсай-Аққыстау, Құлсары-Шоқпар- тоғай, Жантерек-Мұқыр-Сағыз, Ганюшкино-Атырау аралықтары екен. Теміржолшылардың айтуынша, бұл мәселені жергілікті атқарушы және құқық қорғау ор- гандарының қатысуынсыз шешу мүмкін емес. Мал бағу ережелері туралы жүздеген тұрғынға ескертуден бөлек, ережеден үзінді көшірме берілсе де, нәтиже болмай тұр, мал жол бойында жосып жүр. Сондықтан ендігі жерде мал иелері мен жергілікті әкімдікті теміржолдың шығынын төлеуге міндеттеуді заңмен бекіту қажет деседі теміржолшылар.