Атырауда теміржолдағы ұрлық-қарлық мәселесі өзекті

Атырау көлік прокурорының орынбасары жанындағы ведомствоаралық мәжілісте темір жол мекемелеріндегі құқықбұзушылықтың алдын алу бойынша мәселелер қаралды.

Атырау жүк тасымалы мен магистральды желі бөлімшесінің, «Батыс» аймақтық жолаушылар тасымалының Атырау телімі және Атырау станциясы ЖПб өкілдері қатысқан жиында жол бойындағы ұрлық-қарлық өзекті тақырып болды. Жалпы, қоғамда неғұрлым экономикалық жағдай шиеленіскен сайын, соғұрлым қылмысқа бейімділік те арта түседі, соның әсерінен оңай олжа табуды көздейтіндер көбейеді. Көлік прокуратурасы мамандарының айтуынша, теміржолшылар тарапынан да осындай құқықбұзушылық кездесіп тұрады. Бүгінде азық-түліктен бастап бәрі қымбаттап жатыр. Қара не түсті металл бағасы да көтерілді. Міне, осы тұста оңай олжаға кенелуді көздегендер тарапынан рельс кесінділерін сатып жіберу фактілері болған. Сол секілді 402-бекетте рельс бекітпелерін ұрлағандар құрықталған. Ал «Батыс» аймақтық жолаушылар тасымалына тиесілі «Атырау-Алматы» бағытындағы жолаушылар пойызында жолсерік пен жолаушының арасындағы төбелес халық арасына кең тарап, жағымсыз әсер қалдырған. Әрине, бұл жерде кімнің кінәлі екені анықталу үстінде, дегенмен жағымды әрекет емес екені анық. 

Сондықтан прокуратура мамандары қай жерде де қылмыстық құқық бұзушылықтардың алдын алуға шақырды, әсіресе қылмыстық оқиғалар артып отырған Құлсары, Мақат аумақтарындағы еңбек ұжымдары арасында кешенді іс-шаралар жүргізуді ұсынды. Ал «Батыс» аймақтық жолаушылар тасымалы Атырау телімінде болған оқиғаны назарға алып, іс-шара қабылдау, Атырау желілік полицияға қылмыстық құқық бұзушылықтардың алдын алуға бағытталған профилактикалық шараларды ширата түсу тапсырылды.