Рационализаторлық ұсыныстарды қолдауға арналған тренинг өтті
Ақтөбе облысы бойынша меншікті тілші
«ҚТЖ» ЖШС-нің «Батыс» аймақтық филиалы қызметкерлері арасында рационализаторлық ұсыныстарды қолдау, инновацияны дамытуға арналған тренинг өтті.
Техникалық орталықтың ұйытқы болуымен өткен тренингте рационализаторлық қызметтің негізгі принциптері түсіндірілді. Алдымен рационализаторлық ұсыныс бойынша құжаттаманың дұрыс ресімделуіне назар аудару керектігі айтылды. Ең перспективалы жобаларды іріктеу арқылы теміржол саласына жаңашылдық енгізу, қызметкерлерді ынталандыру жүйесі жолға қойылғаны және бұл жұмыстар алдағы уақытта дами беретіні сөз болды. «Үздік инноватор» байқауын ұйымдастыру және өткізу, техникалық шығармашылықтың құқықтық қорғалуын қамтамасыз ету мәселелері қозғалды. Тренингке модераторлық еткен «Батыс» аймақтық филиалының бас инженері Жасұлан Рысқалиев өнертапқыштарды өндіріске жаңашылдық енгізуде тың идеялар ұсынып, автоматтандыру мен механикаландыру саласында белсенді жұмыс істеуге шақырды.
«Рационализаторлық қызмет бойынша игілік көп. Мақұлданған, қолданысқа енгізілген ұсыныстарға компания тарапынан сыйақы қарастырылған. Бүгінгі күні бізде жоба авторларына 257 мың теңгедей ақша төленді», – деді бас инженер.
Тренингке барлық мекеменің бас инженерлері мен техникалық бөлім қызметкерлері қатысты. Рационализаторлық ұсыныстардың ең алдымен экономикалық тиімділігіне назар аудару жағы сөз болды. Теміржолшыларға жоба жазуда тиісті ақпарат берілу қажеттілігіне көңіл бөлу міндеттелді.
Сонымен қатар, тренингте аудиториямен жұмыс, сұрақ-жауап қамтылып, күнделікті тәжірибеден алынған практикалық тапсырмалар берілді. Инновациялық жобалар жасауға жастарды көбірек тарту жағы қарастырылды.
«Тренингтердің теориялық білімді дамытуға ықпалы зор. Теміржолшыларға жоба жасауда жіберілетін кемшіліктерді болдырмау тәсілдері жан-жақты түсіндіріледі. Инженерлер ғылыми-техникалық орталықтармен бірлесе отырып, саладағы әріптестеріне рационализаторлық іс-әрекеттер бойынша көмектеседі, – дейді филиалдың ғылыми-техникалық ақпарат орталығының бастығы Гүлжан Оразқұлова.