Қалпына келтіру пойызы тартылды
Қызылорда облысы бойынша меншікті тілші
Майлытоғай бекетінде бағыттамалық бұрма ауыстырылды. Жұмысқа Қызылорда қалпына келтіру пойызының ауыр техникасын пайдалану тиімді әрі үнемді іс болды.
Алты сағаттық толаскезде жедел іске кіріскен жұмысшылар станцияның екінші жолындағы ескі бұрманы ЕДК-300/2 көтергіш кранымен алып, бұрма төселетін орынды тегістеді. Жер төсемі әзір болғанда жаңа Р-65 маркалы отандық рельстерге темірбетонды шпал бекітілген бағыттамалық бұрмалар тағы да сол көтергіш кранның көмегімен төселді.
– Біздің Қалына келтіру пойызына сеніп тапсырылған бағыттамалық бұрма ауыстыру жұмысы кестеге сай өткізілді. Мұның алдында 16-бекеттегі бағыттамалық бұрманы ауыстырсақ, енді бір-екі күнде Бөрітескен мен Жайылма бекеттеріндегі бағыттамалық бұрмаларды ауыстыруға да тапсырыс алып, дайындық жұмысын жасап жатырмыз, – деді Қызылорда қалпына келтіру пойызының бастығы Берік Әбжаппаров.
Қалпына келтіру пойызының шебері Нұртас Ақбалаев жұмыс барысында кран машинистері Қайрат Баданов пен Мейрамбек Құлахметов, кран машинистерінің көмекшісі Нұрлан Есенәлиев, электростанция машинисі Александр Воропаев, бульдозер машинистері Дархан Нұржанов пен Дәулет Балмановтардың жұмысын айрықша атап өтті. Атқарылатын жұмыстың технологиялық талапқа сай жүргізілуін Қызылорда жол дистанциясы бастығының орынбасары Батыр Мамедалиев бастаған жолшылар бақылады.