Тепловоз бен локомотивтерге сапалы сервистік қызмет көрсетіледі

Арыс қаласында орналасқан «SGM-Group» ЖШС – теміржол машиналарына техникалық қызмет көрсететін ірі кәсіпорын. Локомотив депосының базасында құрылған кәсіпорын түрлі сериялы тепловоз бен локомотивтерге, соңғы үлгідегі теміржол машиналарына техникалық және сервистік қызмет көрсетеді.

 Сонымен қатар, жолаушылар вагондары мен олардың жабдықтарын күрделі жөндеуден өткізеді. Өткен аптада Түркістан облысының инвестиция және экспорт басқармасының басшысы Қайрат Әзімов пен Арыс қаласы әкімінің орынбасары Ерғали Қуандық «SGM-Group» ЖШС-нің өндіріс орнында болып, нысанның экономикалық әлеуетін арттырудың жай-күйін талқылады.  

Қайрат Мұратұлының пікірінше, теміржол саласында озық технологиямен жұмыс істеуге бейімделген «SGM-Group» ЖШСнің облыс экономикасын көтеруде маңызы жоғары. Мекеменің Арыс қаласында орналасуы қаншама жергілікті тұрғындардың тұрақты жұмыспен қамтылуына септігін тигізіп отыр.  

Кәсіпорын басшысы Бауыржан Ескермесов «SGM-Group» ЖШС «Қазақстан темір жолы» ҰК» АҚ-ның салалық ведомстволарымен   өзара әріптестікті нығайта отырып, табысты қызмет етудің мүмкіндіктерін сөз етті. Бүгінде «Электровоз құрастыру зауыты» ЖШС мен «SGM-Group» ЖШС арасындағы өзара тығыз әріптестік нәтижесінде, отандық KZ8A сериялы электровоздарға жоғары деңгейде технологиялық сервистік қызмет көрсетілуде. Айтуынша, сервистік қызмет сапасы жоғары, артық сын айтылған емес.  

Одан бөлек, кәсіпорын ВЛ80С, ВЛ60, ВЛ40М сериялы электровоздарға ТО-4, ТО-6, ал ТЭМ-2 сериялы тепловоздарға ТҚК-3, ТҚК-4, ТҚК-6, ТҚК-7, ТҚК-8 техникалық қызметтерін ұсынады. Сондай-ақ, мұнда ДРС630М (Польшаның Pesa өндірісі) дизель-рельсті құрамына ТҚ-3 пен ТҚ-6 және ТҚ-7 қызметінен бөлек, жолаушылар вагондарына деполық немесе күрделі жөндеу жүргізіледі.