Атырау өңіріндегі жол жөндеу жұмыстары аяқталуға жақын

Биылғы жылғы жоспар бойынша Атырау өңірінде барлығы 92,345 шақырым жолды күрделі жөндеуден өткізу көзделген. Алты ай жазда жүргізілген жұмыс мәреге жетіп, таяу күндері толық аяқталады деп күтілуде.

Жалпы, бүгінге дейін Атырау жол дистанциясы бойынша Қиғаш – Д.Нұрпейісова бекеттері аралығында және Д.Нұрпейісова бекетінің 18,857 шақырым жолы, 265 – Сағыз бекеттері аралығында Сағыз бекетінің 10,012 км жолы, барлығы 28,020 шақырым жол күрделі жөндеуден өтіп, толық салынып бітті. Сондай-ақ, Құлсары жол дистанциясы бойынша 63,476 шақырым жол күрделі жөндеуден өтуі жоспарланған. Бүгінгі таңда осы жолдың ең соңғы шақырымдары салынып жатыр.  

Дистанция бойынша Құлсары – Бейнеу телімінің 465 – Опорная – 464 бекеттері аралығында жоспарланған 35,446 шақырым жолдың ескі темір жол құрылымы түгел алынып, орнына су жаңа темірбетонды шпалдар және бағыттамалы бұрмалар барлық технологиялық талаптар сақталып, салынып бітті. Бұрынғы рельстердің ұзындығы 25 метрлік болып бунақталып салынатын болса, қазіргі уақытта 1500 метрлік түйіспесіз жолдар салынуда. Бұл өз кезегінде болтқа, қапсырмаға деген шығынды да азайтады.  

– Құлсары – Мақат телімінің Шоқпартоғай – Құлсары бекеттері аралығында жоспарланған 28,020 шақырым жол да күрделі жөндеуден өтуде. Қазіргі уақытта Құлсары станциясы басындағы жолдар салынып жатыр. Бұрынғы ағаш шпалдар түгел алынды. Жердің негіздемесі төселіп, енді шебін төсеу, нығыздау, басқа да технологиялық жұмыстар жасалуда. Бұл жұмыстар қараша айында бітеді деп жоспарланып отыр, – дейді Құлсары жол дистанциясы бастығының міндетін атқарушы Рақымжан Көрпебаев.  

Оның айтуынша, бұрын Құлсары-Бейнеу телімінде пойыздар сағатына 40-50 шақырым жылдамдықпен жүрген. Енді күрделі жөндеуден өткен соң ол жолдарда жолаушы пойыздарына – 120, Тальго жүрдек пойызына – 140, ал жүк пойыздарына 100 шақырымға дейін жылдамдықпен жүруге рұқсат беріледі. Күрделі жөндеу жұмыстары барысында мердігер компания «ИнтеграТранс» ПМС телімде пойыздар қозғалысы азайған уақыттарда, көбінесе күндіз не кешке тәулігіне 6 сағаттық толаскез алып отырған. Нәтижесінде пойыздар қозғалысы кестесінде кешігу, артық шығын тіркелмеген, жоспарлы жұмыс уақытылы аяқталып, биылғы жөндеу жұмыстарына нүкте қойылмақ.