Республика күні жамбылдық теміржолшылар марапатталды

Республика күніне арналған салтанатты шарада жамбылдық теміржолшылар Әнұранды жанды дауыста орындады. Мерекеге орай жамбылдық теміржолшылардың мерейін үстем еткен тағы бір қуанышты хабар жария болды.

Республикалық «Сала үздігі - 2022» байқауында «Бюджет есебінен өсім» аталымы бойынша еліміздегі ірі он компанияның ішінен «Алтын» рейтингі бойынша «Жүк тасымалы» ЖШС Жамбыл филиалы – үшінші орын, Луговой рельс дәнекерлеу кәсіпорны төртінші орынды иеленсе, «Күміс» рейтингі бойынша Шу машиналандырылған жол дистанциясы екінші орынды иеленді. Ал «Қола» рейтингі бойынша Жамбыл магистральді желі бөлімшесі үшінші орынды иеленіп, аталған кәсіпорын басшылары марапаттау салтанатына шақырылып отырғаны белгілі болды.

Көпшілдікті Республика күні мерекесімен құттықтаған бөлімше басшылары мен кәсіподақ  ұйымының өкілдері ерен еңбегі еленген  бірқатар теміржолшыларды түрлі марапатпен марапаттады.  Атап айтқанда, «Адал еңбегі үшін» төсбелгісімен Жамбыл вагон пайдалану депосының бастығы Талғат Жасұзақов, Жамбыл белгі беру және байланыс дистанциясының участок бастығы Сүгір Бектасов, Жамбыл электрмен жабдықтау дистанциясының электромеханигі Қанат Үмбетов, Жамбыл жол дистанциясының еңбекті қорғау және техникалық қауіпсіздік бойынша жетекші инженері Шамшидин Дадабаев марапатталды.  Тараз станциясы бастығының орынбасары Нұрлан Құлсариев, Жамбыл локомотив пайдалану депосының электровоз машинисі Ғани Нұрбаев, Жамбыл жол дистанциясының бригадирі Сәбит Убайдуллаев «Кәсібі бойынша үздік» атағын иеленді. Сонымен қатар «Үздік маман» болып танылған Жамбыл магистральді желі бөлімшесінің техникалық бөлімінің жетекші инженері Дария Әлімбетова, Шу станциясының есепке алу бөлімінің персонал жөніндегі менеджері Бақыткүл Әлімжанның мерерйі үстем болды.  Тағы бірқатар теміржолшыларға «ҚТЖ»ҰК» АҚ-ы Басқарма төрағасының Құрмет грамотасы, Алғыс хаты, Жамбыл магистральді желі бөлімшесі директорының Құрмет грамоталары тапсырылды.  Салтанатты шара жергілікті өнерпаздардың концерттік бағдарламасына ұласты.

 Осы күні Луговой рельс дәнекерлеу кәсіпорнының директоры Бақтияр Төлеков те Т.Рысқұлов ауданының әкімі Ерболат Садырқұловтың қолынан «Облысқа сіңірген еңбегі үшін» төсбелгісін алғанын айта кеткен жөн.  Ауданның экономикалық-әлеуметтік әлеуетін көтеруде теміржол кәсіпорынының ауқымды жұмыс атқарып отырғанын ескерсек, бұл лайықты марапат екені сөзсіз.